ក្រុមហ៊ុន Facebook បានបិទបណ្តាញគណនី និងទំព័រ (Page) ក្លែងក្លាយរាប់រយ ដែលកំណត់គោលដៅលើប្រជាជននៅអ៊ុយក្រែន និងមានភ្ជាប់ទៅនឹងបុគ្គលដែលត្រូវសហរដ្ឋអាមេរិកដាក់ទណ្ឌកម្មកន្លងមក ពីបទព្យាយាមជ្រៀតជ្រែកក្នុងការបោះឆ្នោតនៅក្នុងសហរដ្ឋអាមេរិក។
Facebook អះអាងថា បណ្តាញទាំងនោះស្ថិតក្រោមការគ្រប់គ្រងរបស់យុទ្ធនាការបញ្ឆោត និងវេទិកាប្រព័ន្ធផ្សព្វផ្សាយសង្គម និងគេហទំព័រផ្សេងទៀតដើម្បីធ្វើការផ្សព្វផ្សាយព័ត៌មានឯករាជ្យ និងលើកស្ទួយអ្នកនយោបាយអ៊ុយក្រែនរួមទាំងសកម្មភាពផ្សេងជាច្រើនទៀត។ ក្រុមហ៊ុននិយាយថា ក្រុមហ៊ុនចាប់ផ្តើមធ្វើការស៊ើបអង្កេតក្រោយពីមានជំនួយពី FBI ។
ក្រុមហ៊ុន Facebook បានចាត់វិធានការតឹងរឹងដោយបិទចំពោះបុគ្គល និងអង្គភាពដែលត្រូវក្រសួងរតនាគារសហរដ្ឋអាមេរិកដាក់ទាន់កម្ម។ ក្នុងចំណោមបុគ្គលទាំងនោះមានទាំងអ្នកនយោបាយលោក Andriy Derkach សមាជិកសភាគាំទ្ររុស្ស៊ីដែលត្រូវរដ្ឋាភិបាលសហរដ្ឋអាមេរិកដាក់នៅក្នុងបញ្ចីខ្មៅនៅខែកញ្ញា ករណីដែលគាត់ជាប់ចោទពីបទព្យាយាមជ្រៀតជ្រែកក្នុងកិច្ចការបោះឆ្នោតនៅសហរដ្ឋអាមេរិកក្នុងឆ្នាំ២០២០ ដែលមានប្រធានាធិបតី Joe Biden ជាអ្នកឈ្នះ។ ក្រុមហ៊ុន Facebook និយាយថា ក្រុមហ៊ុនបានលុបគណនីរបស់លោក Andriy Derkach នៅខែតុលា ឆ្នាំ២០២០ ។
ក្រុមហ៊ុន Facebook ចាត់ទុកបណ្តាញ ឬទំព័រទាំងនោះថាជាអ្នកប្រឹក្សានយោបាយដែលមានទំនាក់ទំនងជាមួយអ្នកនយោបាយអ៊ុយក្រែនលោក Oleh Kulinich និងលោក Volodymyr Groysman អតីតនាយករដ្ឋមន្ត្រីនៃប្រទេសអ៊ុយក្រែន។ លោក Kulinich ពុំបានឆ្លើយតបចំពោះសំណើសុំការអត្ថាធិប្បាយទេ។ លោក Groysman ក៏ពុំអាចទាក់ទងបានដើម្បីសុំការអត្ថាធិប្បាយបានផងដែរ។
ក្រុមហ៊ុន Facebook និយាយថា ដើម្បីលើកកម្ពស់អ្នកនយោបាយទាំងនោះទំព័រទាំងនោះបានជម្រុញឱ្យមានលក្ខណៈវិជ្ជមានចំពោះបុគ្គលនយោបាយ ដែលទំនងជាពួកគេធ្វើការផ្សព្វផ្សាយដោយបម្រើសេវាកម្មបង់ប្រាក់។
ក្រុមហ៊ុនអះអាងថា សកម្មភាពដែលក្រុមហ៊ុនស៊ើបអង្កេតធ្វើឡើងចាប់ពីឆ្នាំ២០១៥ ផ្តោតតែលើប្រទេសអ៊ុយក្រែន និងមាតិកាដែលផុសប្រឆាំងនឹងប្រទេសរុស្ស៊ី។ក្រុមស៊ើបអង្កេតរបស់ក្រុមហ៊ុន Facebook និយាយថា បណ្តាញក្នុងប្រទេសអ៊ុយក្រែនដែលស្ថិតក្នុងចំណោមប្រភពបណ្តាញកំពូល ដែលក្រុមហ៊ុនលុបចោលទាំងនោះគឺជាកន្លែងសម្រាប់បង្កើនឥទ្ធិពលនៃប្រតិបត្តិការលក់សេវាកម្ម។
ក្រុមហ៊ុន Facebook និយាយថា ក្រុមហ៊ុនបានលុបចោលនូវទំព័រចំនួន ៣៦៣ទំព័រដែលមានអ្នកតាមដានចំនួន ២,៣៧លានគណនី និងមានគណនីចំនួន ៤៧៧គណនីចេញពីបណ្តាញនោះបានបំពានលើគោលការណ៍របស់ក្រុមហ៊ុន Facebook។ បណ្តាញឬផេចទាំងនោះក៏បានចំណាយប្រាក់ប្រហែល៤៩៦,០០០ដុល្លារដើម្បីផ្សាយពាណិជ្ជកម្មលើ Facebook និង Instagram ផងដែរ៕
