ប៉ូលិស Europol បានប្រាប់ឲ្យដឹងនៅថ្ងៃសុក្រថា ជនសង្ស័យ ១១នាក់ ដែលគេជឿថា មានពាក់ព័ន្ធនឹងការវាយប្រហារមេរោគប្រឆាំងនឹងក្រុមហ៊ុន និងរចសម្ព័ន្ធនៅ ៧១ប្រទេស ត្រូវបានសមត្ថកិច្ចតាមចាប់ខ្លួននៅក្នុងប្រទេសអ៊ុយក្រែន និងប្រទេសស៊្វីស។
ប្រតិបត្តិការនេះជាលទ្ធផលនៃកិច្ចសហប្រតិបត្តិការរវាងអ្នកអនុវត្តច្បាប់ និងអាជ្ញាធរតុលាការនៅក្នុងប្រទេសចំនួនប្រាំពីរនៅអឺរ៉ុប និងសហរដ្ឋអាមេរិក។ ប៉ូលិស Europol បានប្រាប់ឲ្យដឹង បន្ថែមថា ជនសង្ស័យ ១២នាក់ ត្រូវបានគេជឿជាក់ថា មានជាប់ពាក់ព័ន្ធនឹងការវាយប្រហារ តាមអ៊ីនធឺរណិត ដែលបង្កផលប៉ះពាល់ដល់ជនរងគ្រោះ ១៨០០នាក់នៅជុំវិញពិភពលោក។ ក្រុមហ៊ុនមួយក្នុងចំណោមក្រុមហ៊ុនរងគ្រោះមានឈ្មោះថា Norsk Hydro ASA (NHY.OL) ដោយនៅឆ្នាំ២០១៩ ក្រុមហ៊ុននេះបានរងគ្រោះពីការវាយប្រហារលើផ្នែកមួយនៃផលិតកម្មរបសខ្លួន។នៅមាន ក្រុមហ៊ុនជាច្រើនទៀតដែលរងការវាយប្រហារពីមេរោគដែលពុំបានបញ្ជាក់ឈ្មោះ។
នៅក្នុងប្រតិបត្តិការវាយឆ្មក់ ប៉ូលិសរឹបអូសបានថវិកាចំនួន $5200 ឡានទំនើប ៥គ្រឿង កុំព្យូទ័រ ទូរស័ព្ទដៃ ដែលប៉ូលិស Europol បាននិយាយថា កំពុងត្រូវបានពិនិត្យដើម្បីស្វែងរក
ភស្តុតាង និងការស៊ើបអង្កេតថ្មីៗបន្ថែម។ អាជ្ញាធរប្រទេសន័រវែស បារាំង ហូឡង់ អ៊ុយក្រែន អាឡឺម៉ង់ ចក្រភពអង់គ្លេស ប្រទេសស្វ៊ីស សហរដ្ឋអាមេរិក បានចូលរួមធ្វើការបង្ក្រាបរួមគ្នាជាមួយ សមត្ថកិច្ច Europol និង Eurojust និងភ្នាក់ងាររបស់សហភាពអឺរ៉ុបសម្រាប់កិច្ចសហប្រតិបត្តិការផ្នែកតុលាការ៕
ប្រែសម្រួល៖ប៉ោក លក្ខិណា
ប្រភពព័ត៌មាន reuters ចុះផ្សាយថ្ងៃទី២៩ ខែតុលា ឆ្នាំ២០២១
