មន្ត្រីក្រសួងការពារជាតិបានលើកឡើងថា គេហទំព័ររបស់ក្រសួងការពារជាតិបែលហ្ស៊ិករងការកំណត់គោលដៅពីការវាយប្រហារតាមអ៊ីនធឺរណិត ដែលបានទាញយកភាពងាយរងគ្រោះថ្មីនៅក្នុងមុខងារលុកចូល ហើយក្រុមការងាររបស់ក្រសួងបានបន្តព្យាយាមការពារបណ្តាញ។
ប្រព័ន្ធផ្សព្វផ្សាយក្នុងតំបន់បានចុះផ្សាយថា ការបំពានលើផ្នែកសន្តិសុខត្រូវបានរកឃើញជាលើកដំបូងនៅសប្តាហ៍មុន ប៉ុន្តែត្រូវបានផ្សព្វផ្សាយជាសាធារណៈនៅថ្ងៃចន្ទដោយអ្នកនាំពាក្យក្រសួងលោកមេបញ្ជាការ Olivier Severin។
ចំណែកឯអ្នកនាំពាក្យក្រសួងការពារជាតិលោក Ludivine Dedonder បានប្រាប់បណ្តាញសារព័ត៌មាន Politico ថា ក្រសួងបានខិតខំធ្វើការយ៉ាងខ្លាំងដើម្បីការពារបណ្តាញ បើទោះបីជាមន្ត្រីមិនទាន់បានធ្វើការអត្ថាធិប្បាយពីប្រភពដើមនៃការវាយប្រហារនេះក៏ដោយ។
ការបំពាននេះបានកំណត់គោលដៅលើកំហុសសុវត្ថិភាពនៅក្នុងឧបករណ៍ប្រើប្រាស់យ៉ាងទូលំទូលាយដែលគេស្គាល់ថា Log4j ដែលវាជាកំហុសមួយរកឃើញដំបូងដោយអ្នកជំនាញ
អ៊ីនធឺរណិតនៅដើមខែនេះ ហើយវាបានបង្កឱ្យមានការព្រួយបារម្ភថា ក្រុមហេគឃ័រអាចប្រើប្រាស់ភាពងាយរងគ្រោះនោះដើម្បីសម្របសម្រួលលើឧបករណ៍ចំនួនរាប់រយលានគ្រឿង។
ក្រុមហ៊ុនជាច្រើន និងមន្រ្តីការពារជាតិនៅក្នុងប្រទេសបែលហ្ស៊ិក និងអ្នកពាក់ព័ន្ធផ្សេងទៀត បានខិតខំជួសជុលលើភាពងាយរងគ្រោះទាំងនោះ ខណៈដែលក្រុមហ៊ុន Google បានប្រគល់ភារកិច្ចឱ្យវិស្វករចំនួន ៥០០នាក់ដើម្បីធានាថាកូដរបស់ក្រុមហ៊ុនគឺត្រឹមត្រូវ។ ចំណែកឯ ភ្នាក់ងារសន្តិសុខអ៊ីនធឺរណិត និងហេដ្ឋារចនាសម្ព័ន្ធរបស់សហរដ្ឋអាមេរិកធ្លាប់បានចេញសេចក្តីណែនាំបន្ទាន់មួយនៅសប្តាហ៍មុនដោយជំរុញឱ្យភ្នាក់ងារសហព័ន្ធផ្សេងទៀតធ្វើការជួសជុលកំហុសនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន rt ចុះផ្សាយថ្ងៃទី២១ ខែធ្នូ ឆ្នាំ២០២១