ChatGPT ដាច់សេវា និងមិនអាចចូលដំណើរការជាបណ្តោះអាសន្នកាលពីថ្ងៃចន្ទ បន្ទាប់ពីអ្នកប្រើប្រាស់មួយចំនួនរកឃើញថា ពួកគេអាចមើលឃើញចំណងជើងនៃប្រវត្តិជជែករបស់អ្នកដទៃ។ អ្នកប្រើប្រាស់ថតអេក្រង់ ChatGPT UI និងផុសលើបណ្តាញសង្គម Reddit និង Twitter ដើម្បីបង្ហាញថា របារចំហៀងដែលផ្ទុកការជជែកមិនមែនជារបស់ពួកគេនោះទេ។
ខណៈពេលដែលពួកគេអាចមើលឃើញតែចំណងជើង និងផ្នែកខ្លះនៃខ្លឹមសារជជែករបស់អ្នកដ៏ទៃ រឿងនេះជាកត្តាតម្រូវឱ្យមានការគិតពិចារណា នៅពេលដែល ChatGPT ផ្តល់សមត្ថភាពក្នុងការចែករំលែកព័ត៌មានលម្អិតជាមួយ ឬសរសេរសំណួរសម្រាប់ chatbot។
អ្នកនាំពាក្យរបស់ក្រុមហ៊ុន OpenAI ប្រាប់អ្នកសារព័ត៌មានប្លូមបឺកថា ក្រុមហ៊ុនបិទ ChatGPT ជាបណ្តោះអាសន្ន បន្ទាប់ពីក្រុមហ៊ុនដឹងពីរបាយការណ៍ទាំងនេះ។ ជាក់ស្តែង កំហុសនៅក្នុងកម្មវិធីប្រភពបើកចំហដែលក្រុមហ៊ុនមិនទាន់បញ្ចេញឈ្មោះ បណ្តាលឱ្យមានបញ្ហានោះ។យោងតាមរបាយការណ៍ឧប្បត្តិហេតុរបស់ក្រុមហ៊ុនបង្ហាញថា ក្រុមហ៊ុនបិទដំណើរការ ChatGPT កាលពីព្រឹកថ្ងៃច័ន្ទ ហើយការជួសជុលក៏ស្ដារសេវាកម្មឡើងវិញ នៅរយៈពេល ១០ម៉ោងក្រោយ។
ទោះជាយ៉ាងណា ប្រវត្តិជជែកនៅតែមិនទាន់ដំណើរការដូចដើម។ ក្រុមហ៊ុន OpenAI ផុសសារជូនដំណឹង ដោយលើកឡើងអំពីរបាចំហៀង (sidebar) រួមជាមួយនឹងការធានាថា ក្រុមហ៊ុនកំពុងធ្វើការដើម្បីស្ដារលក្ខណៈពិសេសនេះឱ្យឆាប់បំផុតតាមដែលអាចធ្វើ។ ក្រុមហ៊ុនមិនទាន់ប្រកាសពីពេលវេលាជាក់ស្តែងសម្រាប់ការស្តារមុខងារនេះនៅឡើយទេ៕
ប្រភព engadget ចុះផ្សាយថ្ងៃទី២១ ខែមីនា ឆ្នាំ២០២៣
