យុទ្ធនាការបន្លំ YouTube ថ្មីមួយគឺកំពុងតែធ្វើឡើងជាលក្ខណៈទូទៅដោយជំរុញឱ្យអ្នកប្រើប្រាស់អាន និងទទួលយកអ្វីដែលហៅថាការផ្លាស់ប្តូរនៅក្នុងច្បាប់ និងគោលការណ៍របស់YouTube។ អ្វីដែលគួរឱ្យខ្លាចនោះគឺថាវាបំពានអាសយដ្ឋានអ៊ីមែលពិតប្រាកដរបស់ YouTube ដើម្បីទាក់ទាញអ្នកប្រើប្រាស់ឱ្យផ្ដល់ព័ត៌មានសម្ងាត់របស់ពួកគេ។
ក្រុមហ៊ុន YouTube ចេញផ្សាយការព្រមានដោយបញ្ជាក់ថា អ្នកប្រើប្រាស់ជាច្រើនលើកឡើងពីការត្អូញត្អែរអំពីយុទ្ធនាការបន្លំដែលកំពុងដំណើរការនេះ។ អ៊ីមែលជូនដំណឹងដល់អ្នកប្រើប្រាស់អំពីការអាប់ដេតមួយចំនួននៅក្នុងគោលការណ៍រកប្រាក់ថ្មីរបស់ YouTube និងច្បាប់ថ្មីមួយចំនួនដែលអ្នកប្រើប្រាស់គួរតែយល់ព្រមដើម្បីបន្តសេវាកម្មនេះ។
ដើម្បីជំរុញអារម្មណ៍នៃភាពបន្ទាន់ ពួកគេត្រូវស្នើឱ្យពិនិត្យឡើងវិញ និងទទួលយកច្បាប់ថ្មីក្នុងរយៈពេលប្រាំពីរថ្ងៃ។ អ៊ីមែលទាំងនោះ មានភ្ជាប់ជាមួយសារ និងមានវីដេអូ YouTube និងតំណភ្ជាប់ទៅកាន់ Google Drive ដែលនៅពេលអ្នកប្រើប្រាស់ចុចរួច វាស្នើឱ្យអ្នកប្រើប្រាស់គោលដៅផ្តល់ព័ត៌មានសម្ងាត់ YouTube របស់ពួកគេ។ អ៊ីមែលបន្លំហាក់ដូចជាត្រូវផ្ញើដោយប្រើ no-reply@youtube[.]com ដែលជាគណនី YouTube ពិតប្រាកដ ដូច្នេះហើយវាកាន់តែជួយបន្ថែមភាពស្របច្បាប់ដល់ការបោកប្រាស់នោះ។
អ្នកស្រាវជ្រាវបច្ចេកវិទ្យាម្នាក់ជូនដំណឹងដល់ YouTube អំពីការបោកប្រាស់នេះតាមរយៈ សារធ្វីត (tweet) ដោយចែករំលែកព័ត៌មានលម្អិតនៃអ៊ីមែលដែលគាត់ទទួល។ គាត់បញ្ជាក់ថា អ៊ីមែលទាំងនោះមិនត្រូវក្លែងបន្លំទេ ហើយត្រូវផ្ញើតាមរយៈលេខសម្គាល់អ៊ីមែលពិតប្រាកដរបស់ YouTube។ ជាក់ស្តែង អ្នកបោកប្រាស់កំពុងបំពានមុខងារចែករំលែករបស់វីដេអូតាមអ៊ីមែលរបស់ YouTube ដែលអនុញ្ញាតឱ្យអ្នកប្រើប្រាស់ចែករំលែកវីដេអូឯកជនរបស់ពួកគេតាមរយៈបណ្តាញជូនដំណឹងតាមសារអ៊ីមែលផ្លូវការរបស់ YouTube។
ការបោកប្រាស់នោះប្រើអាសយដ្ឋានអ៊ីមែលផ្លូវការដើម្បីទាក់ទាញជនរងគ្រោះ ទោះបីជាយ៉ាងណាក៏ដោយ វាក៏មានសញ្ញាជាច្រើនដែលអាចបង្ហាញពីការបោកប្រាស់។ ភាសាដែលប្រើក្នុងអ៊ីមែលគឺពិតជាមិនល្អឥតខ្ចោះ ដោយមានពាក្យចៃដន្យជាច្រើនដូចជា Getting Monetization money earned។ អ៊ីមែលមិមានទ្រង់ទ្រាយត្រឹមត្រូវ ដោយមិនមានចំណុចសញ្ញាសម្គាល់ចំណុចត្រឹមត្រូវ និងមិនមានគម្លាតរវាងកថាខណ្ឌ និងផ្នែកផ្សេងៗ។ ជាងនេះទៅទៀត រយៈពេលផុតកំណត់រយៈពេលប្រាំពីរថ្ងៃគឺជាយុទ្ធសាស្ត្រធម្មតាដែលប្រើដោយអ្នកបោកប្រាស់ជាច្រើននាក់ដើម្បីបង្កើតអារម្មណ៍បន្ទាន់។
ការបំពានលើវេទិកា និងសេវាកម្មពេញនិយមមិនមែនជារឿងថ្មីទេ ហើយការបោកប្រាស់នេះដំណាងឱ្យការរំលឹកមួយផ្សេងទៀតថា វេទិកាប្រព័ន្ធផ្សព្វផ្សាយសង្គមដែលគួរឱ្យទុកចិត្តគឺជាកន្លែងលេងដ៏ពេញនិយមសម្រាប់អ្នកបោកប្រាស់។ ដើម្បីរក្សការពារខ្លួន អ្នកជំនាញណែនាំឱ្យអ្នកប្រើប្រាស់ប្រុងប្រយ័ត្ននៅពេលផ្តល់ព័ត៌មានសំខាន់ណាមួយ ជាពិសេសព័ត៌មានសម្ងាត់។ សូមពិនិត្យមើលឡើងវិញនូវភាពត្រឹមត្រូវនៃអ៊ីមែល ឬតំណណាមួយ ដោយស្កែនពួកវាជាមួយកម្មវិធីសុវត្ថិភាពពិតប្រាកដ ហើយចៀសវាងពាក់ព័ន្ធជាមួយការជូនដំណឹង ការអះអាងនិងការផ្តល់ជូនដែលគួរឱ្យសង្ស័យដែលមើលទៅហាក់ដូចជាមានភាពបន្ទាន់៕
ប្រភពព័ត៌មាន cyware ចុះផ្សាយថ្ងៃទី១០ ខែមេសា ឆ្នាំ២០២៣
