អាជ្ញាធរការពារទិន្នន័យហូឡង់ (Dutch DPA) បានដាក់ចេញការផាកពិន័យជាប្រាក់ ៣០,៥លានអឺរ៉ូ (៣៣,៧លានដុល្លារ) លើក្រុមហ៊ុន Clearview AI ពីបទប្រមូលទិន្នន័យខុសច្បាប់ តាមរយៈការប្រើ Facial Recognition រួមទាំងមានរូបថតប្រជាជនហូឡង់។
ក្រុមហ៊ុន Clearview AI គឺជាក្រុមហ៊ុនបច្ចេកវិទ្យាអាមេរិក ដែលមានជំនាញលើកម្មវិធី Facial Recognition និងត្រូវបានគេស្គាល់ពីការបង្កើតមូលដ្ឋានទិន្នន័យដ៏ធំ (Vast Database) នៃរូបថតត្រឹមមុខ (Facial Images) ចេញពីប្រភពសាធារណៈនៅលើអ៊ីនធឺណិត។ រូបថតទាំងនេះត្រូវបានប្រើសម្រាប់បង្កើតការកំណត់អត្តសញ្ញាណជីវសាស្រ្តតែមួយគត់ (Biometric Identifiers) ដែលអនុញ្ញាតឱ្យអតិថិជនដូចជាទីភ្នាក់ងារអនុវត្តច្បាប់ និងក្រុមហ៊ុនឯកជនអាចកំណត់អត្តសញ្ញាណបុគ្គលណាម្នាក់តាមរយៈការប្រើសំណុំរូបភាព និងវីដេអូរបស់ពួកគេ។
ការអនុវត្តនេះបង្កឱ្យមានភាពចម្រូងចម្រាសពាក់ព័ន្ធនឹងឯកជនភាព និងក្រមសីលធម៌ដែលពាក់ព័ន្ធនឹងកង្វះចំណេះដឹង ឬការយល់ព្រមរបស់អ្នកប្រើប្រាស់សម្រាប់ដំណើរការព័ត៌មានជីវសាស្រ្តរបស់ពួកគេ។ យោងតាមអាជ្ញាធរហូឡង់ DPA ក្រុមហ៊ុន Clearview AI បានបង្កើតមូលដ្ឋានទិន្នន័យដ៏ធំនៃរូបភាពដែលមានរូបថតជាង ៣០ពាន់លាន ជាមួយនឹងរូបថតអ្នកដែលរស់នៅក្នុងប្រទេសហូឡង់ ដោយមិនបានស្នើសុំការឯកភាពពីម្ចាស់រូបថតទេ។ រូបថតទាំងនេះត្រូវបានបំលែងទៅជាកូដជីវសាស្រ្តតែមួយគត់ ដែលអាចត្រូវបានប្រើនៅក្នុងប្រព័ន្ធដំណើរការស្គាល់មុខ (Facial Recognition) ទូទាំងពិភពលោក ដែលអាចកំណត់អត្តសញ្ញាណមនុស្សទាំងនោះ និងភ្ជាប់ពួកគេទៅគណនី និងសកម្មភាពអនឡាញ។ ថ្នាក់ដឹកនាំ Dutch DPA បានថ្លែងថា Facial Recognition គឺជាបច្ចេកវិទ្យារំខានដ៏សំខាន់ ដែលអ្នកមិនអាចបញ្ចេញព័ត៌មានឱ្យនរណាម្នាក់នៅក្នុងពិភពលោកបានឡើយ។
យោងតាមអាជ្ញាធរ Dutch DPA កង្វះខាតនៃការជូនព័ត៌មានដល់ម្ចាស់ទិន្នន័យនោះជាបទល្មើសនៃច្បាប់ការពារទិន្នន័យទូទៅរបស់សហភាពអឺរ៉ុប (GDPR) ដែលបានជំរុញឱ្យអាជ្ញាធរនៅប្រទេសអ៊ីតាលី និងបារាំងផាកពិភ័យ ២០លានអឺរ៉ូលើក្រុមហ៊ុន Clearview AI ក្នុងហេតុផលស្រដៀងគ្នានេះ។ ទោះបីយ៉ាងណា អាជ្ញាធរ DPA ថ្លែងថា ក្រុមហ៊ុន Clearview AI មិនបានផ្លាស់ប្តូរការអនុវត្តនៅប្រទេសអឺរ៉ុបនោះទេ និងរក្សាតម្លាភាពនៃការគ្រប់គ្រងលើទិន្នន័យជីវសាស្រ្តរបស់អ្នកប្រើប្រាស់។ ប្រសិនបើក្រុមហ៊ុន Clearview AI មិនបានកែប្រែ និងបន្តមិនអនុវត្តតាមច្បាប់ អាជ្ញាធរ Dutch DPA គំរាមនឹងបន្ថែមការពិន័យរហូតដល់ ៥,១លានអឺរ៉ូ (៥,៦លានដុល្លារ) ទៀត។
ក្រុមហ៊ុន Clearview AI ច្រានចោលនូវសកម្មភាពទាំងនេះ៖ នៅក្នុងសេចក្តីថ្លែងការណ៍ជាមួយ BleepingComputer ថ្នាក់ដឹកនាំក្រុមហ៊ុន Clearview AI បានបដិសេធចំពោះការលើកឡើងរបស់អាជ្ញាធរ DPA និងបានបន្ថែមថា អាជ្ញាធរហូឡង់មិនមានយុត្តាធិការ (Jurisdiction) ឬសិទ្ធិដាក់ពិន័យលើពួកគេទេ ដោយសារតែពួកគេមិនធ្វើអាជីវកម្មនៅប្រទេសហូឡង់៕
ប្រភពព័ត៌មាន៖ ថ្ងៃទី០៣ ខែកញ្ញា ឆ្នាំ២០២៤
