ទីភ្នាក់ងារសន្តិសុខហេដ្ឋារចនាសម្ព័ន្ធ និងសាយប័រអាមេរិកថ្លែងថា ប្រព័ន្ធផ្សព្វផ្សាយរាយការណ៍ថា ខ្លួនត្រូវបានណែនាំឱ្យឈប់តាមដាន ឬរាយការណ៍អំពីសកម្មភាពសាយប័រនោះគឺជារឿងមិនពិតទេ តាមពិតទៅបេសកកម្មរបស់ខ្លួននៅតែមិនផ្លាស់ប្តូរ។
ទីភ្នាក់ងារសាយប័រអាមេរិកបានបង្ហោះនៅលើ X ថា បេសកកម្មរបស់ CISA គឺដើម្បីការពារប្រឆាំងនឹងការគំរាមកំហែងសាយប័រទាំងអស់លើហេដ្ឋារចនាសម្ព័ន្ធសំខាន់ៗអាមេរិក រួមទាំងការវាយប្រហារពីរុស្ស៊ីផងដែរ។ គ្មានអ្វីប្រែប្រួលនៅក្នុងជំហររបស់ខ្លួនទេ។ របាយការណ៍នានាដែលផ្ទុយពីនេះគឺជាការក្លែងបន្លំ និងបំផ្លាញដល់សន្តិសុខជាតិអាមេរិក។
រឿងនេះកើតឡើងបន្ទាប់ពី Guardian បានរាយការណ៍កាលពីថ្ងៃសៅរ៍ថា រដ្ឋបាលលោកត្រាំ មើលឃើញថា រុស្ស៊ីមិនគំរាមកំហែងសាយប័រប្រឆាំងនឹងហេដ្ឋារចនាសម្ព័ន្ធសំខាន់ៗរបស់អាមេរិក និងប៉ះពាល់ដល់ផលប្រយោជន៍របស់អាមេរិកទេ។ យោងតាមរបាយការណ៍ អនុស្សរណៈថ្មីនៅ CISA ដឹកនាំទីភ្នាក់ងារផ្តល់អាទិភាពដល់ប្រទេសចិន និងការពារប្រព័ន្ធក្នុងស្រុក ហើយមិននិយាយពីប្រទេសរុស្ស៊ីទេ។ The Guardian រាយការណ៍ថា អ្នកវិភាគ CISA ត្រូវបានប្រាប់ដោយផ្ទាល់មាត់កុំឱ្យតាមដាន ឬរាយការណ៍អំពីសកម្មភាពសាយប័ររបស់រុស្ស៊ី។ ទីភ្នាក់ងារ CISA គឺជាទីភ្នាក់ងាររដ្ឋាភិបាលអាមេរិកទទួលខុសត្រូវផ្នែកការពារហេដ្ឋារចនាសម្ព័ន្ធសំខាន់ៗរួមទាំងហេដ្ឋារចនាសម្ព័ន្ធបោះឆ្នោត ពីការគំរាមកំហែងសាយប័រ និងដោយផ្ទាល់។ ទីភ្នាក់ងារត្រួតពិនិត្យ និងកាត់បន្ថយការគំរាមកំហែងសាយប័រពីសត្រូវបរទេសរួមទាំងរុស្ស៊ី ដោយការចែករំលែក ការស៊ើបអង្កេត ការគំរាមកំហែង សម្របសម្រួលដល់ការឆ្លើយតបឧប្បត្តិហេតុ និងធ្វើការជាមួយរដ្ឋាភិបាល រួមទាំងស្ថាប័នឯកជនដើម្បីពង្រឹងសន្តិសុខសាយប័រជាតិ។ ឆ្លើយតបនឹងសំណួរទាំងនេះអំពីរឿងរបស់ Guardian លោក Tricia McLaughlin ជំនួយការលេខាធិការទទួលបន្ទុកកិច្ចការសាធារណៈនៃក្រសួងសន្តិសុខមាតុភូមិអាមេរិក បានប្រាប់ BleepingComputer ថា អនុស្សរណៈនេះគឺក្លែងក្លាយទេ និងបានប្រាប់ថាទីភ្នាក់ងារ CISA នឹងបន្តដោះស្រាយការគំរាមកំហែងសាយប័រពីប្រទេសរុស្ស៊ី។
រឿងនេះគឺមិនត្រឹមត្រូវទេ រឿងទាំងមូលរបស់ Guardian ដែលផ្អែកលើអនុស្សរណៈត្រូវបានលើកឡើង ថា រដ្ឋបាលលោកត្រាំ មិនដែលចេញអនុស្សរណៈនោះទេ និងថា Guardian បដិសេធមិនឱ្យយើងឃើញ ឬផ្តល់កាលបរិច្ឆេទច្បាស់លាស់អំពីអនុស្សរណៈនោះដែរ។ ទីភ្នាក់ងារ CISA នៅតែប្តេជ្ញាចិត្តដោះស្រាយការគំរាមកំហែងសាយប័រចំពោះហេដ្ឋារចនាសម្ព័ន្ធសំខាន់ៗរបស់អាមេរិករួមទាំងមកពីប្រទេសរុស្ស៊ី។ គ្មានអ្វីត្រូវបានផ្លាស់ប្តូរទេ នៅក្នុងជំហរ ឬអាទិភាពរបស់ទីភ្នាក់ងារនៅលើបញ្ហានេះ។ TheRecord ក៏បានរាយការណ៍កាលពីថ្ងៃសុក្រថា រដ្ឋមន្រ្តីការពារជាតិ លោក Pete Hegseth បានបញ្ជាឱ្យ Cyber Command បញ្ឈប់ប្រតិបត្តិការវាយលុកដែលបានគ្រោងទុកលើប្រទេសរុស្ស៊ី។ ជាងនេះទៀត The New York Times និង The Washington Post កាលពីថ្ងៃសៅរ៍បានលើកឡើងថា ការផ្លាស់ប្តូរនេះនៅក្នុងជំហរគឺជាមធ្យោបាយតែមួយគត់សម្រាប់ដំណើរការចរចាចុងក្រោយ ដើម្បីបញ្ឈប់ការឈ្លានពានរបស់រុស្ស៊ីលើអ៊ុយក្រែន។ មន្រ្តីការពារជាតិជាន់ខ្ពស់បានចែករំលែក បន្ទាប់ពីសន្ទរកថា នៅពេលបានទាក់ទងអំពីការផ្លាស់ប្តូរនៅក្នុងទិសដៅរបស់ Cyber Command។ ជាងនេះទៀត គាត់បានបន្តថា ដោយសារការព្រួយបារម្ភអំពីសុវត្ថិភាពប្រតិបត្តិការ អាមេរិកមិនធ្វើអត្ថាធិប្បាយ ឬពិភាក្សាអំពីព័ត៌មានសម្ងាត់សាយប័រ ផែនការ ឬប្រតិបត្តិការនោះទេ។
ប្រភពព័ត៌មាន៖ ថ្ងៃទី០៣ ខែមីនា ឆ្នាំ២០២៥
