មជ្ឈមណ្ឌលសន្តិសុខសាយប័រជាតិប្រទេសស្វីស (NCSC) បានប្រកាសពីកាតព្វកិច្ចរាយការណ៍ថ្មីមួយសម្រាប់អង្គភាពហេដ្ឋារចនាសម្ព័ន្ធសំខាន់ៗនៅក្នុងប្រទេស ដែលត្រូវរាយការណ៍ពីការវាយប្រហារសាយប័រទៅកាន់ទីភ្នាក់ងារនៅក្នុងរយៈពេល ២៤ម៉ោងបន្ទាប់ពីរកឃើញឧប្បត្តិហេតុ។
យោងតាមសេចក្តីប្រកាស NCSC បានឱ្យដឹងថា ការទាមទារថ្មីនេះត្រូវបានណែនាំពីការឆ្លើយតបចំពោះការកើនឡើងនៃចំនួនឧប្បត្តិហេតុសន្តិសុខសាយប័រ និងផលប៉ះពាល់ទៅលើប្រទេសស្វីស។ ខាងក្រោមនេះជាឧទាហរណ៍ពីប្រភេទនៃការវាយប្រហារសាយប័រ ដែលនឹងត្រូវរាយការណ៍រួមមាន៖
– ការវាយប្រហារសាយប័រដែលបង្កគ្រោះថ្នាក់ដល់ប្រតិបត្តិការរបស់ហេដ្ឋារចនាសម្ព័ន្ធសំខាន់ៗ
– ឧបាយកល ការអ៊ីនគ្រីប ឬការច្រោះយកទិន្នន័យ
– ការជម្រិតទារប្រាក់ ការគំរាមកំហែង និងការបង្ខិតបង្ខំ
– មេរោគដែលបានដំឡើងនៅលើប្រព័ន្ធ
– លួចចូលដំណើរការក្នុងប្រព័ន្ធដោយគ្មានការអនុញ្ញាត
បទបញ្ជាត្រូវបានណែនាំតាមរយៈការធ្វើវិសោធនកម្មចំពោះច្បាប់សន្តិសុខព័ត៌មានវិទ្យា (ISA) ដែលនឹងចូលជាធរមាននៅដើមខែមេសា ឆ្នាំ២០២៥។ ច្បាប់នេះអនុវត្តចំពោះក្រុមហ៊ុនផ្តល់សេវាសំខាន់ៗដូចជា ស្ថាប័នផ្គត់ផ្គង់ទឹកភ្លើង រដ្ឋាភិបាលក្នុងតំបន់ និងអង្គភាពដឹកជញ្ជូន។ បើយោងតាមប្រកាសបានឱ្យដឹងថា គណៈកម្មាការសហព័ន្ធបានសម្រេចថា វិសោធនកម្មចំពោះច្បាប់សន្តិសុខព័ត៌មានវិទ្យា (ISA) កាលពីចុងខែកញ្ញា ឆ្នាំ២០២៣ នឹងចាប់ផ្តើមអនុវត្តនៅដើមខែមេសាខាងមុខនេះ។ ច្បាប់ ISA កំណត់ថា អាជ្ញាធរ និងអង្គការស្ថិតក្រោមកាតព្វកិច្ចរាយការណ៍មានដូចជា ក្រុមហ៊ុនផ្គត់ផ្គង់ទឹកផឹក និងថាមពល ក្រុមហ៊ុនធ្វើដំណើរ និងរដ្ឋបាលខេត្ត និងរដ្ឋបាលឃុំសង្កាត់ ត្រូវរាយការណ៍ពីការវាយប្រហារសាយប័រទៅកាន់ NCSC នៅក្នុងរយៈពេល ២៤ម៉ោងបន្ទាប់ពីរកឃើញបញ្ហា។
រយៈពេលនៃការបន្ធូរបន្ថយនឹងត្រូវបានផ្តល់ឱ្យរហូតដល់ដើមខែតុលា ឆ្នាំ២០២៥ ប៉ុន្តែការខកខានមិនបានអនុវត្តក្រោយកាលបរិច្ឆេទដែលបានកំណត់នោះ នឹងត្រូវផាកពិន័យរហូតដល់ ១០០,០០០ CHF (114,000ដុល្លារ)។ អង្គការ ឬស្ថាប័ន ដែលប៉ះពាល់ដោយសារឧប្បត្តិហេតុសន្តិសុខសាយប័រនឹងត្រូវរាយការណ៍តាមរយៈអនឡាញពីគេហទំព័រ NCSC Site ឬតាមរយៈអ៊ីម៉ែល ដោយពុំចាំបាច់ចុះឈ្មោះទេ។ របាយការណ៍ដំបូង ត្រូវបានដាក់ចេញក្នុងរយៈពេល ២៤ម៉ោងបន្ទាប់ពីរកឃើញឧប្បត្តិហេតុ និងរាយការណ៍ព័ត៌មានលម្អិតបន្តបន្ទាប់ក្នុងរយៈពេល ១៤ថ្ងៃក្រោយ។ មានច្បាប់លើកលែងពិសេសក្រោមច្បាប់ Art.74c របស់ ISG។ ប្រទេសស្វីសហៅការទាមទារថ្មីនេះថា គឺជាជំហានដ៏រឹងមាំមួយនៅក្នុងប្រទេសអំពីសន្តិសុខសាយប័រ ដែលបង្ហាញថា វាអនុលោមតាមច្បាប់ណែនាំរបស់ NIS ដែលជាច្បាប់ស្តីពីសន្តិសុខសាយប័រទាំងសហភាពអឺរ៉ុប ដែលអនុវត្តចំពោះប្រតិបត្តិការនៃសេវាកម្មសំខាន់ៗ រួមទាំងអ្នកផ្តល់សេវាឌីជីថល។
ប្រភពព័ត៌មាន៖ ថ្ងៃទី១០ ខែមីនា ឆ្នាំ២០២៥
