ក្រុមហ៊ុន Google បានប្រកាសមុខងារការពារថ្មីដោយប្រើប្រាស់ AI ដើម្បីទប់ស្កាត់សារឆបោក និងការប្រើប្រាស់មុខងារបញ្ជូនការហៅទូរស័ព្ទបន្តដោយបំពានលើប្រព័ន្ធ Android។មុខងារថ្មីទាំងនេះកំពុងដាក់ឱ្យប្រើប្រាស់ជាបន្តបន្ទាប់លើឧបករណ៍ដែលមានសិទ្ធិប្រើប្រាស់។ វិធានការទាំងនេះមានគោលបំណងដោះស្រាយការឆបោកតាមទូរស័ព្ទដែលកាន់តែស្មុគស្មាញ រួមមានសារក្លែងក្លាយពីធនាគារ ការក្លែងបន្លំលេខទូរស័ព្ទ និងការប្រើប្រាស់ AI ដើម្បីចម្លងសំឡេងមនុស្ស។
Google បានបញ្ជាក់ថា ការឆបោកកាន់តែពិបាកសម្គាល់ ដូច្នេះអ្នកប្រើប្រាស់ស្ទើរតែមិនអាចរកឃើញសញ្ញាគួរឱ្យសង្ស័យទាំងអស់ដោយខ្លួនឯងបានទេ។ មុខងាររកឃើញការឆបោកដែលមានស្រាប់ក្នុងកម្មវិធី Phone និង Messages របស់ Google អាចសម្គាល់ការហៅទូរស័ព្ទ និងសារដែលសង្ស័យថាជាការឆបោកបានជាង ៥ លានករណីក្នុងមួយខែ។ Google រំពឹងថា វិធានការការពារថ្មីនឹងជួយរកឃើញការគំរាមកំហែងបានកាន់តែច្រើន។
មុខងារការពារថ្មីផ្តោតលើកម្មវិធី Google Messages ដោយប្រើប្រាស់ AI Gemini តាមប្រព័ន្ធ Cloud ដើម្បីវិភាគការសន្ទនាដែលស្មុគស្មាញ និងស្វែងរកសញ្ញានៃការឆបោក។ មុខងារថ្មីប្រើប្រាស់ Gemini Nano ដែលដំណើរការលើឧបករណ៍ផ្ទាល់ ដើម្បីពិនិត្យតំណភ្ជាប់មិនស្គាល់ ដោយប្រើប្រាស់ព័ត៌មានពីគេហទំព័រតាមពេលវេលាជាក់ស្តែង។ ប្រព័ន្ធក៏បង្ហាញការព្រមានឱ្យកាន់តែច្បាស់ មុនពេលអ្នកប្រើប្រាស់បើកតំណភ្ជាប់ពីលេខទូរស័ព្ទដែលមិនបានរក្សាទុក។ មុខងារការពារថ្មីតាម Cloud ត្រូវបានបិទជាលំនាំដើម (Default) ហើយអ្នកប្រើប្រាស់អាចបើកប្រើដោយខ្លួនឯង។
Google កំពុងពង្រឹង Android ដើម្បីរកឃើញការឆបោក លាក់ព័ត៌មានរសើបពេលចែករំលែកអេក្រង់ និងទប់ស្កាត់ការប្រើប្រាស់មុខងារបញ្ជូនការហៅបន្តដោយគ្មានការយល់ដឹងពីអ្នកប្រើប្រាស់។ Google ក៏កំពុងពង្រីកប្រព័ន្ធផ្ទៀងផ្ទាត់ការហៅពីធនាគារ ដើម្បីជួយទប់ស្កាត់ការក្លែងបន្លំតាមទូរស័ព្ទផងដែរ។
អ្នកប្រើប្រាស់ Android គួរតែធ្វើបច្ចុប្បន្នភាព Android ទៅកាន់កំណែថ្មីបំផុត ធ្វើបច្ចុប្បន្នភាពកម្មវិធីឱ្យបានទៀងទាត់ ផ្ទៀងផ្ទាត់អត្តសញ្ញាណអ្នកហៅទូរស័ព្ទ ឬអ្នកផ្ញើសារដោយឯករាជ្យ នៅពេលមានសំណើឱ្យចាត់វិធានការលើគណនី ឬផ្តល់ព័ត៌មានរសើប។
ប្រភព BleepingComputer ចេញផ្សាយថ្ងៃទី១៥ ខែតុលា ឆ្នាំ២០២៦
