Flavio Aggio ដែលជាប្រធានផ្នែកសុវត្ថិភាពព័ត៌មានវិទ្យានៃ WHO បាននិយាយថាអត្តសញ្ញាណនៃ Hacker មិនទាន់កំណត់បាននោះទេ ប៉ុន្តែការប៉ុនប៉ងរបស់ពួកគេមិនជោគជ័យឡើយ។ លោកបានប្រាប់ថាការប៉ុនប៉ង Hack ស្ថាប័នរបស់ខ្លួន និងដៃគូរបស់ស្ថាប័ន គឺមានការកើនឡើង ស្របពេលដែលពួកគេប្រយុទ្ធប្រឆាំងនឹងកូវីដ១៩ ដែលបានសម្លាប់មនុស្សជាង ១៥ ០០០ នាក់នៅទូទាំងពិភពលោក។
ការប៉ុនប៉ងវាយប្រហារលើ WHO ត្រូវបាន Reuters ដឹងមុនតាមរយៈអ្នកជំនាញផ្នែកសុវត្ថិភាពលើអ៊ីនធឺណិតលោក Alexander Urbelis ដែលរូបលោកបានធ្វើការតាមដានសកម្មភាពលើអ៊ីនធឺណិតគួរឲ្យសង្ស័យ។
Urbelis និយាយថាលោកចាប់បានសកម្មភាពនៅអំឡុងថ្ងៃទី ១៣ ខែមីនា ពេលដែល Hacker មួយក្រុមដែលលោកបានតាមដានកន្លងមក បានដំណើរការវិបសាយមានបង្កប់មេរោគមួយ ដែលបង្កើតឡើងយកលំនាំតាមប្រព័ន្ធអ៊ីមែលផ្ទៃក្នុងរបស់ WHO។
អ្នកជំនាញរូបនេះ និយាយថាមិនដឹងថានរណាជាអ្នកនៅពីក្រោយសកម្មភាពនេះទេ ប៉ុន្តែប្រភពពីរទៀតបានប្រាប់ Reuters ថាពួកគេសង្ស័យលើក្រុម Hacker ដែលមានឈ្មោះថា DarkHotel ដែលពួកគេចាប់ផ្ដើមមានសកម្មភាពយ៉ាងហោចណាស់គឺចាប់តាំងពីឆ្នាំ ២០០៧។
លោក Urbelis និយាយថាលោកបានចាប់តាមដានវិបសាយរាប់ពាន់ដែលបង្កើតឡើងជារៀងរាល់ថ្ងៃក្នុងទ្រង់ទ្រាយទាក់ទងនឹងកូវីដ១៩ ដែលភាគច្រើនគឺជាវិបសាយដែលមានបង្កប់មេរោគ៕
