ក្រុមហ៊ុន ZecOps រាយការណ៍កាលពីថ្មីៗនេះថា ក្រុមហ៊ុនកំណត់អត្តសញ្ញាណភាពងាយរងគ្រោះនៅថ្ងៃ zero-day ដែលមាននៅក្នុងកម្មវិធីអ៊ីម៉ែលរបស់ប្រព័ន្ធ iOS។ ក្រុមហ៊ុននិយាយថា កំហុសនោះកើតមានតាំងពីមានការចេញផ្សាយប្រព័ន្ធប្រតិបត្តិការ iOS 6 នៅក្នុងឆ្នាំ 2012 ។
ក្រុមហ៊ុនបន្តថាអ្នកវាយប្រហារអាចបំពានភាពងាយរងគ្រោះដើម្បីមើល កែប្រែ ឬលុបអ៊ីម៉េលរបស់ជនរងគ្រោះ។ ក្រុមហ៊ុន ZecOps បញ្ជាក់ថា រួមជាមួយនឹងគុណវិបត្តិផ្សេងទៀតវាអាចធ្វើឱ្យក្រុមហេគឃ័រអាចចូលប្រើប្រាស់លើឧបករណ៍តាមរយៈចន្លោះប្រហោងអ៊ីម៉ែលនេះ។
ក្រុមហ៊ុន ZecOps បានណែនាំឱ្យអ្នកប្រើប្រាស់ iOS 12 គួរតែបន្ទាប់សម័យទៅប្រើ iOS 13 វិញ ព្រោះវាអាចចៀសផុតពីហានិភ័យមួយនេះ ហើយសម្រាប់អ្នកប្រើ iOS 12 ត្រូវមានការប្រុងប្រយ័ត្នខ្ពស់ក្នុងការឆែកអ៊ីម៉ែល។
ក្រុមហ៊ុន Apple និយាយថា ក្រុមហ៊ុនរបស់ខ្លួនវិភាគលើរបាយការណ៍របស់ក្រុមហ៊ុន ZecOps និងកំណត់ថា បញ្ហាទាំងនេះមិនបង្កគ្រោះថ្នាក់ដល់អ្នកប្រើប្រាស់របស់ក្រុមហ៊ុន Apple ភ្លាមៗទេ ។ ក្រុមហ៊ុន Apple បន្ថែមថា ក្រុមអ្នកស្រាវជ្រាវពិតជាកំណត់នូវបញ្ហាចំនួន ៣នៅក្នុងកម្មវិធីម៉ែល ប៉ុន្តែបញ្ហាលើកម្មវិធីម៉ែលតែមួយមុខមិនអាចឆ្លងកាត់ប្រព័ន្ធការពារសុវត្ថិភាព iPhone និង iPad នោះទេ។
ក្រុមហ៊ុន Apple ក៏បន្ថែមផងដែរថា ក្រុមហ៊ុនរបស់ខ្លួនមិនរកឃើញភ័ស្តុតាងណាមួយដែលអាចបញ្ជាក់ថា វាមានភាពងាយរងគ្រោះត្រូវប្រើប្រាស់ដើម្បីប្រឆាំងនឹងអតិថិជនរបស់ខ្លួននោះទេ។ ក្រុមហ៊ុនបច្ចេកវិទ្យាមួយនេះដោះស្រាយកំហុសនៅក្នុងប្រព័ន្ធប្រតិបត្តិការ iOS 13.4.5 beta រួចទៅហើយ ហើយក្រុមហ៊ុនគ្រោងនឹងធ្វើការជួសជុលដល់អ្នកប្រើប្រាស់ទាំងអស់នៅពេលដែលក្រុមហ៊ុនបញ្ចេញនូវបច្ចុប្បន្នភាពសុវត្ថិភាពបន្ទាប់របស់ខ្លួន៕
ប្រភពព័ត៌មាន Securityweek ផ្សាយថ្ងៃទី២៤ ខែមេសា ឆ្នាំ២០២០
