មានករណីវាយឆ្មក់ដ៏ឃោរឃៅមួយបានកើតឡើងនៅមន្ទីរពេទ្យមួយនៅភាគខាងលិចទីក្រុងកាប៊ុលប្រទេសអាហ្វហ្កានីស្ថាន ជាកន្លែងដែលអង្គភាពវេជ្ជបណ្ឌិតគ្មានព្រំដែន (MSF) ធ្វើប្រតិបត្តិការសម្ភព។
ហេតុការណ៍នេះបានបណ្តាលឱ្យមនុស្សចំនួន ១៣នាក់ស្លាប់ ដោយក្នុងនោះមានទាំងទារក ២នាក់ផងដែរ។ ក្រុមភារវករត្រូវបានសមត្ថកិច្ចបាញ់សម្លាប់ទាំងអស់ក្រោយពីមានការប្រឈមមុខដាក់គ្នាអស់រយៈពេលជាច្រើនម៉ោង។
ខ្មាន់កាំភ្លើងបានធ្វើការវាយប្រហារលើមន្ទីរពេទ្យដែលមានគ្រែចំនួន១០០គ្រែ ហើយមន្ទីពេទ្យនោះមានទីតាំងស្ថិតនៅក្នុងតំបន់ Dasht-e-Barchi នៃរដ្ឋធានីអាហ្វហ្កានីស្ថាននៅព្រឹកថ្ងៃអង្គារ។ យ៉ាងហោចណាស់មានការផ្ទុះយ៉ាងខ្លាំងចំនួនពីរត្រូវបានគេលឺចេញពីទីតាំងកើតហេតុ ក្រោយពីការផ្ទុះអាវុធបានកើតឡើង។ គេរាយការណ៍ថា ការវាយប្រហារចាប់ផ្តើមកើតឡើង នៅពេលមានបុរសពាក់ឯកសណ្ឋានយោធាធ្វើការបំផ្ទុះគ្រាប់បែកអត្តឃាតនៅច្រកចូលបរិវេណមន្ទីពេទ្យ បន្ទាប់មកបុរសនោះបានសម្រុកចូលធ្វើការបាញ់ប្រហារដោយប្រើកាំភ្លើង និងគប់គ្រាប់បែកដៃ។
កងកម្លាំងសន្តិសុខអាហ្វហ្កានីស្ថានចូលធ្វើប្រតិបត្តិការនៅកន្លែងកើតហេតុ ហើយការប្រឈមមុខដាក់គ្នាបានបញ្ចប់នៅរយៈពេលប៉ុន្មានម៉ោងក្រោយ ក្រោយមកខ្មាន់កាំភ្លើងទាំងអស់ត្រូវបានសម្លាប់។ ការវាយឆ្មក់នេះបានបណ្តាលឱ្យមនុស្សចំនួន១៣នាក់ស្លាប់ នៅក្នុងមន្ទីរពេទ្យ ដោយនៅក្នុងចំនួននោះមានទទារកដែលទើបនឹងកើតចំនួន២នាក់។ មនុស្សចំនួន១៥ នាក់បានរងរបួសហើយត្រូវបានបញ្ជូនទៅមន្ទីរពេទ្យដទៃទៀតដើម្បីព្យាបាល។
គេមិនទាន់បង្ហាញពីអត្តសញ្ញាណរបស់អ្នកវាយប្រហារទាំង៤នាក់នោះភ្លាមៗទេ។ ក្រុមសកម្មប្រយុទ្ធតាលីបង់បានបដិសេធថា សមាជិករបស់ពួកគេពុំមានជាបពាក់ព័ន្ធនឹងការវាយប្រហារទៅលើមន្ទីរពេទ្យ ដែលការអះអាងនេះនាំឱ្យមានការសន្និដ្ឋានថា សមាជិករដ្ឋ អ៊ីស្លាម (IS ដែលជាអតីត ISIS) ត្រូវតែជាអ្នកនៅពីក្រោយការវាយប្រហារ។
ក្រុម IS បានប្រកាសទទួលស្គាល់ចំពោះការវាយប្រហារដែលមានលក្ខណៈលេចធ្លោជាច្រើននៅក្នុងប្រទេសអាហ្វហ្គានីស្ថាននៅរយៈពេលប៉ុន្មានខែថ្មីៗនេះរួមទាំងចំពោះការវាយប្រហារមួយលើប្រាសាទ Sikh នៅខែមីនា។ សង្កាត់ Dasht-e-Barchi ជាផ្ទះរបស់ជនជាតិ Hazaras ជាច្រើននាក់ ដែលពួកគេជាសមាជិកនៃជនជាតិភាគតិច Shia។ ក្រុមភេរវករ IS ដែលជាក្រុមជ្រុលនិយម Sunni ជារឿយៗធ្វើការវាយប្រហារដោយកំណត់គោលដៅផ្តោតលើក្រុមនិកាយស៊ីអ៊ីត (Shiites)។
គេរាយការណ៍ថា អ្នកវាយប្រហារទាំងនោះបានព្យាយាមចូលទៅក្នុងផ្ទះសំណាក់មួយនៅក្បែរបរិវេណមន្ទីរពេទ្យ ដែលមានបុគ្គលិកពេទ្យបរទេសស្នាក់នៅ។ អង្គភាពពេទ្យ MSF បាន និងកំពុងតែគាំទ្រដល់មន្ទីរពេទ្យ Dasht-e-Barchi ដែលផ្តល់ការថែទាំសុខភាពមាតា។ អង្គភាពនេះនិយាយថា មន្ទីពេទ្យនេះជាកន្លែងតែមួយគត់នៅក្នុងសង្កាត់ដែលប្រជាជនមានចំនួនច្រើនជាងមួយលាននាក់ ហើយវាជាមន្ទីពេទ្យមានសមត្ថភាពដោះស្រាយបញ្ហាដឹកជញ្ជូនអ្នកជំងឺបន្ទាន់ និងធ្វើការជញ្ចូនស្មុគស្មាញ៕
ប្រភពព័ត៌មាន RT ផ្សាយថ្ងៃទី១២ ខែឧសភា ឆ្នាំ២០២០
