យោងតាមរដ្ឋាភិបាលបានឱ្យដឹងថា ប្រទេសថៃនឹងអនុញ្ញាតឱ្យហាងលក់ទំនិញ ផ្សារទំនើប និងអាជីវកម្មផ្សេងទៀតបើកដំណើរការឡើងវិញពីថ្ងៃអាទិត្យនេះដោយសារករណីការឆ្លងកូរ៉ូណាវីរុសថ្មីនេះកំពុងថយចុះ។ ហាងលក់គ្រឿងអេឡិចត្រូនិក គ្រឿងសង្ហារឹម និងសម្ភារៈការិយាល័យនឹងស្ថិតក្នុងចំណោមអាជីវកម្មដែលត្រូវបានអនុញ្ញាតឱ្យដំណើរការឡើងវិញផងដែរ។
ទីភ្នាក់ងារសារព័ត៌មានរ៉យទ័រនិយាយថាប្រទេសនេះរាយការណ៍ពីករណីឆ្លងមេរោគកូវីដ ១៩ ថ្មីចំនួន ៧ កាលពីថ្ងៃសុក្រដែលទាំងអស់ត្រូវបាននាំចូលពីបរទេសខណៈចំនួនអ្នកស្លាប់នៅតែមិនផ្លាស់ប្តូរនៅត្រឹមតែ ៥៦ នាក់នោះ។ អាជីវកម្មផ្សេងទៀតត្រូវបានអនុញ្ញាតឱ្យដំណើរការឡើងវិញចាប់ពីថ្ងៃអាទិត្យរួមមានហាងធ្វើក្រចក គ្រឿងសំអាង និងហាងលក់សំលៀកបំពាក់ បន្ទប់ប្រជុំ សណ្ឋាគារ និងមជ្ឈមណ្ឌលសន្និបាត។ បណ្ណាល័យ សាលវិចិត្រ និងសារមន្ទីរក៏ត្រូវបានកំណត់បើកឡើងវិញជាថ្មីផងដែរ។
បម្រាមគោចរពេលយប់នឹងត្រូវបង្រួមខ្លីជាងមុនមួយម៉ោងចាប់ពីម៉ោង ១១ យប់ដល់ម៉ោង ៤ ព្រឹកដែលកាលពីមុនគឺម៉ោង ១០ យប់ដល់ ៤ ព្រឹក។ ប្រទេសថៃបានបន្ធូរបន្ថយការរឹតត្បិតមួយចំនួនកាលពីថ្ងៃទី ៣ ឧសភាដែលអនុញ្ញាតឱ្យអាជីវកម្មចំនួន ៦ ប្រភេទបើកដំណើរការឡើងវិញរួមមានផ្សារ ហាងកាត់សក់ និងអ្នកថែរក្សាសត្វចិញ្ចឹមជាដើម៕
ប្រភព RT ចុះផ្សាយថ្ងៃទី ១៥ ខែឧសភា ឆ្នាំ ២០២០
