គណៈកម្មការសុខភាពជាតិ (NHC) និយាយកាលពីថ្ងៃសុក្រថាហានិភ័យនៃការកើតឡើងវិញនៃមេរោគកូវីដ ១៩ នៅក្នុងប្រទេសចិនពីការឆ្លងមេរោគដែលជាករណីនាំចូលនោះគឺអាចគ្រប់គ្រងបានហើយ។
ប្រទេសចិនបានរាយការណ៍ពីករណីឆ្លងកូរ៉ូណាវីរុសថ្មីចំនួន ៤ ករណីនៅថ្ងៃទី ១៤ ខែឧសភា។ ប្រទេសនេះបានហាមឃាត់ជនបរទេសភាគច្រើនមិនឱ្យចូលតាំងពីចុងខែមីនាដោយសារជំងឺរាតត្បាតរាលដាលពាសពេញពិភពលោក។
ទីភ្នាក់ងារសារព័ត៌មានរ៉យទ័រនិយាយថាអនុរដ្ឋលេខាធិការ NHC លោក Zeng Yixin ក៏បានប្រាប់អ្នកសារព័ត៌មានផងដែរថាវ៉ាក់សាំងកូវីដ ១៩ មួយចំនួនត្រូវបានគ្រោងនឹងបញ្ចប់ការសាកល្បងដំណាក់កាលទី ២ របស់ពួកគេនៅក្នុងខែកក្កដានេះ។
ទីក្រុងរបស់ប្រទេសចិននៅកណ្តាលនៃការផ្ទុះជំងឺនេះគឺទីក្រុងវូហាននិយាយកាលពីថ្ងៃសុក្រថា ខ្លួនបានធ្វើតេស្ត៍មនុស្សជាង ៣ លាននាក់ក្នុងចំណោមប្រជាជន ១១ លាននាក់របស់ខ្លួនចំពោះកូរ៉ូណាវីរុសនេះ។
អាជ្ញាធរកំពុងព្យាយាមធ្វើតេស្តប្រជាជនទាំងអស់នៅក្នុងការប៉ុនប៉ងដើម្បីវាយតំលៃចំនួនអ្នកមានរោគសញ្ញាបន្ទាប់ពីការប្រមូលផ្តុំនៃករណីឆ្លងថ្មីបានបង្កើនការភ័យខ្លាចនៃរលកទីពីរនៃការឆ្លងមេរោគនេះ៕
ប្រភព RT ចុះផ្សាយថ្ងៃទី ១៥ ខែឧសភា ឆ្នាំ ២០២០
