យោងតាមប្រភពច្បាស់ការបានឱ្យដឹងថា ក្រុមតាលីបង់ដែលកំពុងកាន់អំណាចនៅអាហ្វហ្គានីស្ថានបានប៉ះទង្គិចគ្នាជាមួយឆ្មាំព្រំដែនរបស់អ៊ីរ៉ង់នៅព្រំដែននៃប្រទេសទាំងពីរ។
ក្រុមសកម្មប្រយុទ្ធបាននិយាយថា យុទ្ធជនរបស់ពួកគេម្នាក់ស្លាប់នៅក្នុងការប្រយុទ្ធកាលពីថ្ងៃអាទិត្យ នៅតំបន់ព្រំដែនរវាងខេត្តនីមរ៉ូហ្ស នៅប្រទេសអាហ្វហ្គានីស្ថាន និងហីម៉ង់ ក្នុងប្រទេសអ៊ីរ៉ង់។
ចំពោះឧប្បត្តិហេតុនេះប្រទេសនីមួយៗបន្ទោសគ្នាទៅវិញទៅមក និងគួររំលឹកដែរថាកាលពីមួយឆ្នាំមុន ពួកតាលីបង់វាយលុកចូលអាហ្វហ្គានីស្ថានផងដែរ។
កាលពីខែមុនអ៊ីរ៉ង់បានរាយការណ៍ពីការស្លាប់ឆ្មាំម្នាក់ នៅក្នុងឧប្បត្តិហេតុមួយនៅក្នុងតំបន់ដូចគ្នានេះផងដែរ។
ព្រឹត្តិការណ៍ពិតប្រាកដនៃការប៉ះទង្គិចចុងក្រោយបំផុត គឺមិនច្បាស់លាស់នៅឡើយទេ ក៏ប៉ុន្តែរបាយការណ៍មួយរបស់អ៊ីរ៉ង់និយាយថា ការបាញ់ប្រហារបានចាប់ផ្តើមនៅពេលដែលកងកម្លាំងតាលីបង់បានព្យាយាមលើកទង់ជាតិរបស់ពួកគេនៅលើទឹកដីដែលមិនមែនជាអាហ្វហ្គានីស្ថាននោះទេ។
សួមបញ្ជាក់ថានៅក្នុងឧប្បត្តិហេតុនេះគេរាយការណ៍ថា មិនមានអ្នករងរបួសនៅខាងភាគីអ៊ីរ៉ង់នោះទេ៕
ប្រភពព័ត៌មាន BBC ចុះថ្ងៃទី១ ខែសីហា ឆ្នាំ២០២២
ប្រែសម្រួលដោយ ឱក សុវណ្ណារ័ត្ន