យោងតាមប្រភពច្បាស់ការបានឱ្យដឹងថា អគ្គីភ័យបានឆាបឆេះតំបន់ផ្សារទំនើបមួយក្នុងរដ្ឋធានីយេរេវ៉ាន់ ប្រទេសអាមេនី បន្ទាប់ពីការផ្ទុះដ៏ខ្លាំងក្លាដែលប្រព័ន្ធផ្សព្វផ្សាយក្នុងស្រុកនិយាយថា បណ្តាលមកពីឃ្លាំងកាំជ្រួច។
យ៉ាងហោចណាស់មនុស្សបីនាក់បានស្លាប់ និងរាប់សិបនាក់ត្រូវបានបញ្ជូនទៅមន្ទីរពេទ្យបន្ទាប់ពីការបំផ្ទុះនៅផ្សារស៊ូម៉ាលូ។
នៅក្នងខ្សែរវីដេអូបង្ហាញមានមនុស្សរត់ចេញ ខណៈផ្សែងយ៉ាងសន្ធោន្ធៅបានសាយភាយយ៉ាងឆាប់រហ័សបន្ទាប់ពីការផ្ទុះនេះ។ ជាមួយនេះអ្នកពន្លត់អគ្គីភ័យ និងបុគ្គលិកពេទ្យប្រមាណ២០០នាក់ ត្រូវបានបញ្ជូនទៅកាន់កន្លែងកើតហេតុ។
ទីភ្នាក់ងារព័ត៌មាន AFP រាយការណ៍ថា អ្នកជីករណ្ដៅបានទាញមនុស្សចេញពីគំនរបាក់បែក និងអ្នកស្ម័គ្រចិត្តបានជួយកិច្ចខិតខំប្រឹងប្រែងជួយសង្គ្រោះដោយប្រើដៃទទេរបស់ពួកគេ។
មកដល់ម៉ោងនេះ មិនទាន់ដឹងអំពីមូលហេតុដែលបណ្ដាលឱ្យកាំជ្រួចផ្ទុះនៅឡើយទេ៕
ប្រភពព័ត៌មាន BBC ចុះថ្ងៃទី៨ ខែសីហា ឆ្នាំ២០២២
ប្រែសម្រួលដោយ ឱក សុវណ្ណារ័ត្ន