ទីក្រុងតេហេរ៉ង់ ថ្ងៃទី២០ ខែធ្នូ (ស៊ីនហួ) ប៉ូលិសអ៊ីរ៉ង់បានរឹបអូសគ្រាប់កាំភ្លើងខុសច្បាប់នៅខោនធីកាសអ៊ីស៊ីរិន នៅខេត្តឃឺម៉ាន់សាភាគខាងលិច និងចាប់ខ្លួនជនសង្ស័យម្នាក់ នេះបើយោងតាមទីភ្នាក់ងារសារព័ត៌មានសាធារណៈរដ្ឋអ៊ីស្លាម IRNA បានរាយការណ៍កាលពីថ្ងៃអង្គារ។
ជាមួយនេះរបាយការណ៍របស់ IRNA គ្រាប់កាំភ្លើងដែលបានរកឃើញនៅក្នុងរថយន្តដឹកទំនិញអ៊ីរ៉ាក់មួយគ្រឿង ដែលត្រូវបានស្នើឲ្យទាញយកមកត្រួតពិនិត្យដោយប៉ូលិសកំពុងល្បាតនៅខេត្តជិតផ្សារព្រំដែនផាវីសខាន់ នេះបើតាមការលើកឡើងរបស់លោក អាលី អាកបា ចាវីដាន មេបញ្ជាការប៉ូលិសខេត្តឃឺម៉ាន់សា។
ក្រោយពីពិនិត្យឃើញរថយន្តដឹកទំនិញ កម្លាំងសមត្ថកិច្ចបានរកឃើញគ្រាប់កាំភ្លើង ៧៣៧គ្រាប់លាក់ទុកនៅក្រោមស៊ុមរថយន្ត ហើយលោកចាវីដានបានបន្ថែមថា ជនសង្ស័យត្រូវបានប្រគល់ឱ្យទៅកាន់អាជ្ញាធរតុលាការអ៊ីរ៉ង់៕
ប្រភពព័ត៌មាន Xinhua ចុះថ្ងៃទី២០ ខែធ្នូ ឆ្នាំ២០២២
ប្រែសម្រួលដោយ ឱក សុវណ្ណារ័ត្ន
