ក្រុមសកម្មប្រយុទ្ធរដ្ឋអ៊ីស្លាម (ISIS) កាលពីថ្ងៃចន្ទបានអះអាងទទួលខុសត្រូវចំពោះការវាយប្រហារ លើក្រុមសកម្មប្រយុទ្ធតាលីបង់នៅក្នុងទីក្រុងកាប៊ុល។ ក្រុមសកម្មប្រយុទ្ធរដ្ឋអ៊ីស្លាម បាននិយាយនៅក្នុងក្រុមតេឡេក្រាមថា ការវាយប្រហារកាលពីថ្ងៃអាទិត្យបានសម្លាប់មនុស្ស ២០នាក់ និងបង្ករបួសមនុស្ស ៣០នាក់។
អ្នកនាំពាក្យក្រសួងមហាផ្ទៃគ្រប់គ្រងដោយក្រុមសកម្មប្រយុទ្ធតាលីបង់អាហ្វហ្គានីស្ថានបាននិយាយថា ហេតុការណ៍ផ្ទុះនៅខាងក្រៅអាកាសយានដ្ឋានយោធាក្នុងទីក្រុងកាប៊ុលបានបង្ករបួសដល់មនុស្សជាច្រើននាក់។
យ៉ាងណាមិញ ប្រភពក្រសួងមហាផ្ទៃបានបដិសេធចំពោះតួលេខជនរងគ្រោះដែលក្រុមសកម្មប្រយុទ្ធរដ្ឋអ៊ីស្លាម (ISIS) បានអះអាងនោះ ហើយក្រសួងមហាផ្ទៃបាននិយាយថា ពួកគេនឹងបញ្ចេញតួលេខមនុស្សស្លាប់ជាផ្លូវការ។
ក្រុមសកម្មប្រយុទ្ធរដ្ឋអ៊ីស្លាម (ISIS) បានអះអាងចំពោះការវាយប្រហារកម្រិតខ្ពស់ជាច្រើននៅក្នុងទីក្រុងកាប៊ុល រាប់បញ្ចូលទាំងការវាយប្រហារនៅសណ្ឋាគារមួយដែលបានទទួលភ្ញៀវពាណិជ្ជករចិន និងការបាញ់ប្រហារនៅស្ថានទូតប៉ាគីស្ថាន ដោយទីក្រុងអ៊ីស្លាម៉ាបាដបានចាត់ទុកថា នោះគឺជាការប៉ុនប៉ងធ្វើឃាតប្រឆាំងនឹងឯកអគ្គរដ្ឋទូតរបស់ខ្លួន ដែលបានរត់គេចខ្លួនដោយគ្មានគ្រោះថ្នាក់៕
ប្រែសម្រួល៖ប៉ោក លក្ខិណា
ប្រភពព័ត៌មាន ndtv ចុះផ្សាយថ្ងៃទី០៣ ខែមករា ឆ្នាំ២០២៣
