ប្រទេសអ៊ីរ៉ង់៖ភ្នាក់ងារសារព័ត៌មានផ្លូវការរបស់អ៊ីរ៉ង់អ៊ីអាអ៊ិនអេ បានរាយការឱ្យដឹងថា មនុស្សម្នាក់ត្រូវបានសម្លាប់ និង២នាក់ផ្សេងទៀត រងរបួសកាលពីព្រឹកថ្ងៃសៅរ៍ក្នុងហេតុការណ៍បាញ់ប្រហារនៅក្រុមហ៊ុនប្រេង និងឧស្ម័ន នៅខេត្តឃូហ្គីលូយេ និងខេត្តប៊យយ័រអាម៉ាដ ភាគនិរតីនៃប្រទេសអ៊ីរ៉ង់។
នៅក្នុងរបាយការណ៍ដដែលមានបន្ថែមខ្លឹមសារទៀតថា ការវាយប្រហារនោះធ្វើឡើងដោយបុគ្គលិកប្រដាប់អាវុធរបស់ក្រុមហ៊ុនប្រេងហ្កាកសារ៉ាន់ និងក្រុមហ៊ុនផលិតឧស្ម័ន នៅតំបន់ហ្កាកសារ៉ាន់ ដោយអ្នកវាយប្រហារបានចូលទៅក្នុងការិយាល័យគីមីរបស់ក្រុមហ៊ុន និងបាញ់ប្រហារទៅលើបុគ្គលិក។ ប្រភពបន្ថែមថា អ្នកវាយប្រហារត្រូវបានប៉ូលិសចាប់ខ្លួន ខណៈដែល កំពុងរត់គេចចេញពីកន្លែងកើតហេតុ។
បើយោងតាមការបញ្ជាក់ពីភ្នាក់ងារសារព័ត៌មានណាតថូនឡាញបានឱ្យដឹងថា អ្នកវាយប្រហារនោះ មិនសប្បាយចិត្តនឹងការផ្លាស់ប្តូរតួនាទីរបស់គាត់នៅក្នុងក្រុមហ៊ុន និងបានធ្វើការវាយប្រហារបន្ទាប់ពីមានជម្លោះជាមួយអ្នកគ្រប់គ្រងរបស់គាត់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៧ ខែមករា ឆ្នាំ២០២២