ប្រទេសសូម៉ាលី៖រដ្ឋាភិបាលសូម៉ាលីបាននិយាយកាលពីថ្ងៃសៅរ៍ថា រដ្ឋាភិបាលបានបិទគណនីធនាគារ ២៥០គណនី ដែលជាកម្មសិទ្ធរបស់ក្រុមសកម្មប្រយុទ្ធ អាល់ ស្ហារបាប ដើម្បីកាត់ផ្តាច់ប្រភពជំនួយថវិការបស់ក្រុមនេះ។
មន្ត្រីជាន់ខ្ពស់សូម៉ាលីប្រាប់សន្និសីទសារព័ត៌មានថា លើសពីនេះទៅទៀត គណនីប្រាក់ចល័តចំនួន ៧០គណនីរបស់ក្រុមសកម្មប្រយុទ្ធនេះក៏ត្រូវបានបិទផងដែរ ដែលជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាលបន្ថែមដើម្បីបិទលំហូរហិរញ្ញវត្ថុរបស់ពួកគេ។
គួររំលឹកផងដែរថា ប្រទេសសូម៉ាលីបានប្រកាសសង្រ្គាមទាំងស្រុងប្រឆាំងនឹងក្រុមដែលមានទំនាក់ទំនងជាមួយក្រុមសកម្មប្រយុទ្ធអាល់កៃដា។ ទោះបីជាក្រុមសកម្មប្រយុទ្ធទាំងនេះត្រូវបានបណ្តេញចេញពីទីក្រុងម៉ូហ្កាឌីស៊ូកាលពីឆ្នាំ២០១១ក៏ដោយ ក៏នៅតែមានក្រុមសកម្មប្រយុទ្ធមួយចំនួនបន្តការវាយឆ្មក់នៅតាមតំបន់ជនបទដដែល៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយនៅថ្ងៃទី១៥ ខែមករា ឆ្នាំ២០២៣