ប្រទេសសូម៉ាលី៖ អាជ្ញាធរបាននិយាយថា កាលពីថ្ងៃអាទិត្យកម្លាំងទ័ពសូម៉ាលីបានសម្លាប់ក្រុមសកម្មប្រយុទ្ធ អាល់ ស្ហាបាប ៦នាក់ និងបានបញ្ចប់ការឡោមព័ទ្ធដែលមានរយៈពេលជាច្រើនម៉ោងដោយបណ្តាញដែលមានទំនាក់ទំនងជាមួយក្រុមសកម្មប្រយុទ្ធអាល់កៃដានៅក្នុងទីក្រុងម៉ូហ្កាឌីស្យុ ប្រទេសសូម៉ាលី។
សេចក្ដីថ្លែងការណ៍ចេញពីក្រសួងព័ត៌មានប្រទេសសូម៉ាលីមានខ្លឹមសារថា ជនស៊ីវិល៥នាក់ក៏ត្រូវបានសម្លាប់នៅក្នុងការវាយប្រហារបំផ្ទុះគ្រាប់បែកអត្តឃាត និងការបាញ់ប្រហារដែលកើតឡើងនៅទីស្នាក់ការរដ្ឋបាលកណ្តាលនៃតំបន់ បេនណាឌៀរ ក្នុងសង្កាត់ហាម៉ាវីន។
សេចក្តីថ្លែងការណ៍ដដែលក៏មានបន្ថែមខ្លឹមសារថា ក្រុមសកម្មប្រយុទ្ធបានក្លែងបន្លំជាកងទ័ពជាតិ ដើម្បីឱ្យពួកគេឆ្លងផុតពីរបាំងសន្តិសុខ ហើយធ្វើការវាយប្រហារតែម្តង។ ការវាយប្រហារដោយក្រុមសកម្មប្រយុទ្ធ អាល់ ស្ហាបាប បានបង្កឱ្យមានការភ្ញាក់ផ្អើលនៅក្នុងសង្កាត់ហាម៉ាវីន និងឈានទៅដល់ការបិទផ្សារទំនើប ធនាគារ និងកន្លែងអាជីវកម្មផ្សេងទៀតនៅក្បែរនោះ។
សាក្សីនៅកន្លែងកើតហេតុបាននិយាយថា៖ “ខ្ញុំបានឮសំឡេងផ្ទុះបន្ទាប់មកមានការបាញ់កាំភ្លើង។ ខ្ញុំមានអារម្មណ៍ភ័យខ្លាច ហើយបានបិទហាងរបស់ខ្ញុំ ហើយកន្លែងលក់ដូរផ្សេងទៀតនៅក្នុងផ្សារក៏បានបិទដែរ“។
ក្រុមសកម្មប្រយុទ្ធ អាល់ ស្ហាបាប បានអះអាងទទួលខុសត្រូវចំពោះការវាយប្រហារនោះ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៣ ខែមករា ឆ្នាំ២០២៣
