ប្រទេសអ៊ីរ៉ាក់៖ យោធាអ៊ីរ៉ាក់បាននិយាយកាលពីថ្ងៃអាទិត្យថា ចំនួនអ្នកស្លាប់ដោយការវាយប្រហារតាមអាកាសកាលពីថ្ងៃសៅរ៍ទៅលើក្រុមសកម្មប្រយុទ្ធរដ្ឋអ៊ីស្លាម (IS) នៅខេត្តសាឡាស់ហ៊ូឌីនក្នុងប្រទេសអ៊ីរ៉ាក់ បានកើនឡើងទៅដល់ ៥នាក់។
សេចក្តីថ្លែងការណ៍មួយពីបញ្ជាការប្រតិបត្តិការរួម ហៅកាត់ថា (JOC) បានឲ្យដឹងថា ទាហានរកឃើញសាកសពក្រុមសកម្មប្រយុទ្ធ IS ២នាក់ និងបំណែករាងកាយរបស់ក្រុមសកម្មប្រយុទ្ធ៣នាក់ផ្សេងទៀតដែលរាយប៉ាយនៅកន្លែងលាក់ខ្លួនរបស់ក្រុមសកម្មប្រយុទ្ធដែលត្រូវបានទម្លាក់គ្រាប់បែកលើកាលពីថ្ងៃសៅរ៍ដោយយន្តហោះអ៊ីរ៉ាក់នៅតំបន់ថ្មក្នុងខេត្តសាឡាហ៊ូឌីន ភាគខាងកើត បន្ថែមពីលើឃ្លាំងអាវុធ និងឃ្លាំងរំសេវមួយ។
កាលពីថ្ងៃសៅរ៍ សេចក្តីថ្លែងការណ៍របស់ JOC មុននេះបន្តិចបានលើកឡើងថា យន្តហោះអ៊ីរ៉ាក់វាយប្រហារតាមអាកាសទៅលើក្រុមសកម្មប្រយុទ្ធរដ្ឋអ៊ីស្លាម ២នាក់នៅកន្លែងលាក់ខ្លួនរបស់ពួកគេនៅជិតតំបន់ ថូស ខឺមាធូ ហើយបានសម្លាប់ពួកគេទាំងអស់។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរឡើងជាងមុន ចាប់តាំងពីកម្លាំងសន្តិសុខអ៊ីរ៉ាក់បានកម្ចាត់ក្រុមសកម្មប្រយុទ្ធរដ្ឋអ៊ីស្លាមកាលពីឆ្នាំ២០១៧។ ទោះបីជាយ៉ាងណាក៏ដោយក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់បានបង្កប់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀតដោយលួចវាយឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៣ ខែមករា ឆ្នាំ២០២៣