ប្រទេសអ៊ីរ៉ង់៖ ភ្នាក់ងារសារព័ត៌មានផ្លូវការរបស់អ៊ីរ៉ង់ អាយអអ៊ិនអេ បានរាយការណ៍ថា មន្ត្រីប៉ូលិស ២នាក់ ត្រូវបានសម្លាប់កាលពីព្រឹកថ្ងៃអង្គារ ក្នុងហេតុការណ៍វាយប្រហារដោយក្រុមចោរ នៅខេត្តស៊ីស្ថាន និងខេត្តបាឡូជីស្ថាន ភាគអាគ្នេយ៍នៃប្រទេសអ៊ីរ៉ង់។
យោងតាមការស្រង់សម្តីរបស់លោក មូហាម៉ាដ ឃ្វានបារ៉ី មានខ្លឹមសារថា មន្ត្រីប៉ូលិស ២នាក់ ដែលគេស្គាល់ឈ្មោះថា លោក មូកថារ មូមេនី និងលោក អាប៊ូហ្សា អូម៉ីដវ៉ារ ត្រូវគេវាយធ្វើបាបនៅវេលាម៉ោង២រំលងអធ្រាត្រម៉ោងក្នុងស្រុកនៅពេលដើរល្បាតជាមួយសហការីរបស់ពួកគេនៅច្រកចូលស្រុកបាមពួរ។
លោក ឃ្វានបារ៉ី បានបន្ថែមឱ្យដឹងទៀតថា ក្រុមចោរបានរត់គេចចេញពីកន្លែងកើតហេតុ ក្រោយពីការវាយប្រហាររួច។ តម្រុយមួយចំនួនត្រូវបានរកឃើញ ហើយការស្វែងរកកំពុងដំណើរការដើម្បីចាប់ខ្លួនជនសង្ស័យ៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៤ ខែមករា ឆ្នាំ២០២២