ប្រទេសយេម៉ែន៖ មន្ត្រីយោធារដ្ឋាភិបាលម្នាក់បាននិយាយថា ឆ្មាំយាមព្រំដែន២នាក់ និងមន្ត្រីម្នាក់មកពីកងកម្លាំងរដ្ឋាភិបាលយេម៉ែន ត្រូវបានសម្លាប់ក្នុងការវាយប្រហារដោយក្រុមឧទ្ទាមហ៊ូធីនៅខេត្ត អាល់ ចាហ្វ ភាគឦសានរបស់ប្រទេសនេះកាលពីព្រឹកថ្ងៃអង្គារ។
មន្ត្រីយោធាក្នុងតំបន់បាននិយាយក្នុងលក្ខខណ្ឌមិនបញ្ចេញឈ្មោះថា៖ “ក្រុមឧទ្ទាមហ៊ូធីបានធ្វើការវាយប្រហារមួយ និងបានកំណត់គោលដៅទៅលើទីតាំងកងកម្លាំងការពារព្រំដែនរបស់រដ្ឋាភិបាលនៅតំបន់ព្រំដែន អាបថារ នៃខេត្ត អាល់ ចាហ្វ ដោយបង្កឱ្យមានការប៉ះទង្គិចគ្នាខ្លាំង”។
ប្រភពបានបញ្ជាក់ថា ការវាយប្រហារនោះថែមទាំងបានបណ្តាលឱ្យមនុស្សជាច្រើននាក់ផ្សេងទៀតរងរបួស។
លោកបន្ថែមថា“ក្រុមអ្នកវាយប្រហារហ៊ូធី បានប្រើអាវុធធុនធ្ងន់ និងបានប៉ុនប៉ង ដណ្តើមយកតំបន់យុទ្ធសាស្ត្រព្រំដែន ប៉ុន្តែឆ្មាំព្រំដែនបានរារាំងផែនការរបស់ក្រុមឧទ្ទាមទាំងនោះ បន្ទាប់ពីមានការប្រយុទ្ធគ្នាជាច្រើនម៉ោង”។
ហេតុការណ៍ប៉ះទង្គិចគ្នា បានកើតឡើងនៅក្នុងតំបន់ជិតព្រំដែនរវាងប្រទេសអារ៉ាប៊ីសាអូឌីត ដែលដោយគាំទ្រកងកម្លាំងរដ្ឋាភិបាលយេម៉ែនក្នុងការប្រយុទ្ធជាមួយក្រុមឧទ្ទាមហ៊ូធី។
ប្រភពបានបន្តថា ស្ថានការណ៍នៅតែមានភាពតានតឹងនៅក្នុងតំបន់បន្ទាប់ពីមានវត្តមានរបស់ក្រុមឧទ្ទាមហ៊ូធី ដែលជាសកម្មភាពជាក់ស្តែងមានគោលបំណងចាប់ផ្តើមការវាយប្រហាររបស់ពួកគេឡើងវិញក្នុងរយៈពេលប៉ុន្មានម៉ោង។
កាលពីដើមខែនេះ មន្ត្រីក្នុងតំបន់បាននិយាយថា ភាគីសង្រ្គាមរបស់ប្រទេសយេម៉ែនកំពុងត្រៀមខ្លួនចំពោះរលកជម្លោះថ្មីនៅឆ្នាំ២០២៣ ដោយសារមិនមានវិធានការមឺងម៉ាត់ណាមួយដើម្បីឆ្ពោះទៅរកសន្តិភាពប្រកបដោយនិរន្តរភាព។
នៅតាមតំបន់ផ្សេងៗទៀតក្នុងប្រទេសយេម៉ែនត្រូវបានគេមើលឃើញពីការប្រឈមមុខដាក់គ្នាដោយប្រដាប់អាវុធជាបន្តបន្ទាប់រវាងក្រុមជម្លោះក្នុងស្រុក បន្ទាប់ពីបទឈប់បាញ់ដែលសម្របសម្រួលដោយអង្គការសហប្រជាជាតិបានផុតកំណត់កាលពីខែតុលាឆ្នាំមុន។
ប្រទេសយេម៉ែនជាប់គាំងនៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាមហ៊ូធីដែលគាំទ្រដោយអ៊ីរ៉ង់ដណ្តើមខេត្តមួយចំនួននៅភាគខាងជើងមកគ្រប់គ្រង និងបង្ខំ រដ្ឋាភិបាលយេម៉ែនដែលគាំទ្រដោយអារ៉ាប៊ីសាអូឌីតចេញពីរាជធានីសាណា៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៤ ខែមករា ឆ្នាំ២០២៣
