សាធារណរដ្ឋប្រជាធិបតេយ្យកុងហ្គោ៖ អ្នកនាំពាក្យកងទ័ពបានប្រាប់ភ្នាក់ងារសារព័ត៌មានថា យ៉ាងហោចណាស់មនុស្ស២០នាក់រងរបួសកាលពីល្ងាចថ្ងៃពុធ អំឡុងពេលមានការវាយប្រហារដោយគ្រាប់បែកនៅផ្សារតូចមួយកន្លែង នៅក្នុងខេត្ត គីវូ ខាងជើងនៃទីក្រុងបេនី នៅភាគឦសាននៃសាធារណរដ្ឋប្រជាធិបតេយ្យកុងហ្គោ។
លោកប្រធាន អេនថូនី មវ៉ាលូស្ហាយី អ្នកនាំពាក្យរបស់កងទ័ពកុងហ្គោនៅក្នុងតំបន់បេនី បាននិយាយថា ឧបករណ៍បំផ្ទុះកែច្នៃមួយត្រូវបានគេបង្កប់ថង់ដែលមានដំឡូងមីដាក់នៅក្បែរម៉ាស៊ីនកិនម្សៅនៅក្នុងផ្សារមួយកន្លែង។ បើតាមសម្តីអ្នកនាំពាក្យដែលភ្នាក់ងារព័ត៌មានបានធ្វើការទំនាក់ទំនងទៅបានឱ្យដឹងថា អ្នករបួសភាគច្រើនជាស្ត្រីលក់ដូរនៅផ្សារនៅពេលដែលឧបករណ៍នោះបានផ្ទុះ។ យ៉ាងហោចណាស់មានមនុស្ស ៧នាក់រងរបួសធ្ងន់។
លោក មវ៉ាលូស្ហាយី បាននិយាយដោយបន្ទោសពីសោកនាដកម្មនេះថាជាទង្វើរបស់ក្រុមឧទ្ទាមនៃកងកម្លាំងប្រជាធិបតេយ្យសម្ព័ន្ធមិត្ត ដែលហៅកាត់ថា (ADF) ដែលមានខ្លឹមសារថា៖ “ សម្រាប់ពេលនេះ យើងមិនមានព័ត៌មានលម្អិតគ្រប់គ្រាន់ទេ ប៉ុន្តែកងកម្លាំងសន្តិសុខ និងសេវាកម្មជំនាញបានបិទទីតាំងកើតហេតុដើម្បីស៊ើបអង្កេត”។
លោកបានបញ្ជាក់ថា៖ “ទោះជាយ៉ាងណាក៏ដោយ យើងដឹងថា នោះគឺជាស្នាដៃរបស់ក្រុមភេរវករ ADF” ។
កាលពីដើមខែនេះ មានមនុស្សយ៉ាងហោចណាស់ ១៤នាក់ត្រូវបានសម្លាប់ និងប្រមាណជា ៦០នាក់ផ្សេងទៀតរងរបួស នៅពេលដែលគ្រាប់បែកមួយបានផ្ទុះនៅក្នុងព្រះវិហារនៅស្រុកកាស៊ីនឌី នៃខេត្តគីវូខាងជើង។ លោក គីនស្ហាស្ហា ក៏បានបន្ទោសហេតុការណ៍វាយប្រហារនោះទៅលើក្រុមឧទ្ទាម ADF ផងដែរ។
គួរបញ្ជាក់ផងដែរថា ផ្នែកខាងកើតនៃសាធារណរដ្ឋប្រជាធិបតេយ្យកុងហ្គោ មានបញ្ហាជាច្រើនទស្សវត្សមកហើយដោយក្រុមឧទ្ទាមជាច្រើនក្រុម ជាពិសេសក្រុមឧទ្ទាមនៃកម្លាំងប្រជាធិបតេយ្យសម្ព័ន្ធមិត្ត ADF និងក្រុមឧទ្ទាមនៃចលនា ២៣ខែមីនា (M២៣) ដែលជាសុបិន្តអាក្រក់ចំពោះប្រទេសក្នុងតំបន់៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៦ ខែមករា ឆ្នាំ២០២៣