ប្រទេសប៉ាគីស្ថាន៖ មន្ត្រីម្នាក់បានប្រាប់ភ្នាក់ងារសារព័ត៌មានថា ចំនួនអ្នកស្លាប់ដោយសារហេតុការណ៍បំផ្ទុះគ្រាប់បែកអត្តឃាតដែលបានកំទេចវិហារអ៊ីស្លាមមួយកន្លែងកាលពីល្ងាចថ្ងៃចន្ទនៅខេត្តផេសហាវើរភាគពាយ័ព្យនៃប្រទេសប៉ាគីស្ថាន បានកើនឡើងដល់ ៤៤នាក់។
លោក ម៉ូហាម៉េដ អាស៊ីម អ្នកនាំពាក្យមន្ទីពេទ្យ ឡេឌី រ៉ីឌីង បាននិយាយថាចំនួនអ្នកស្លាប់បានកើនឡើងដោយសារអ្នករបួសខ្លះមានសភាពធ្ងន់ធ្ងរ ហើយសាកសពជាច្រើនទៀតត្រូវបានគេរកឃើញចេញពីបំណែកនៃវិហារអ៊ីស្លាមដែលដួលរលំបន្ទាប់ពីមានហេតុការណ៍បំផ្ទុះគ្រាប់បែកនោះ។
អ្នកនាំពាក្យបានបន្ថែមឱ្យដឹងថា យ៉ាងហោចណាស់មានមនុស្សរងរបួស ១៥៧នាក់គឺកំពុង ព្យាបាល ដែលក្នុងនោះមានមនុស្សប្រមាណជា ១២ទៅ១៥នាក់ទៀត កំពុងស្ថិតក្នុងស្ថានភាពធ្ងន់ធ្ងរសម្រាកព្យាបាលនៅមន្ទីពេទ្យ ដែលនេះជាការព្រួយបារម្ភថាចំនួនអ្នកស្លាប់អាចនឹងកើនឡើងបន្ថែមទៀត។
ចំនួនអ្នកស្លាប់ដែលកើនឡើងរួមមានទាំងមន្ត្រីប៉ូលិសបីនាក់ និងមន្ត្រីប៉ូលិសផ្សេងទៀត ជនស៊ីវិល អ្នកដឹកនាំបួងសួង និងស្ត្រីម្នាក់ដែលរស់នៅក្នុងតំបន់ក្បែរវិហារអ៊ីស្លាម។ យ៉ាងហោចណាស់មានជនរងគ្រោះ ៣នាក់នៅមិនទាន់បានស្គាល់អត្តសញ្ញាណនៅឡើយ។
លោក ម៉ូហាម៉េដ អ៊ីចាស់ ខាន មន្ត្រីប៉ូលិសក្រុងនៃស្រុកផេសវើរនៅក្នុងខេត្តខាយប័រផាកថុនវ៉ា បានប្រាប់ភ្នាក់ងារសារព័ត៌មានថា មនុស្សប្រមាណជា ៣០០នាក់កំពុងបន់ស្រន់នៅក្នុងវិហារអ៊ីស្លាមនៃតំបន់ ប៉ូលិសឡាញ ខណៈនោះគ្រាប់បែកបានផ្ទុះឡើង ដោយបានសម្លាប់ និងបង្ករបួសដល់មនុស្សជាច្រើននាក់រាប់បញ្ជូលទាំងមន្ត្រីប៉ូលិសផងដែរ។
លោកបាននិយាយថា កាផ្ទុះដ៏ខ្លាំងនោះបានបំផ្លាញផ្នែកមួយនៃអគារវិហារអ៊ីស្លាម ដែលមានរូងខាងក្នុង ហើយជាប់អ្នកគោរពបូជាជាច្រើននាក់នៅក្នុងនោះ។
តំបន់ប៉ូលិសឡាញមានទីតាំងស្ថិតនៅក្នុងតំបន់សំខាន់បំផុតនៃស្រុកផេសហាវើរ ជាកន្លែងដែលភ្នាក់ងារអនុវត្តច្បាប់មួយចំនួនធំ រាប់បញ្ជូលទាំងកម្លាំងយោធាហ្វ្រុនធីអ័រក្រប និងនាយកដ្ឋានប្រឆាំងភេរវកម្មរបស់ប៉ូលិសក៏មានទីតាំងស្ថិតនៅទីនោះផងដែរ។
ប្រភពព័ត៌មានផ្លូវការពីប៉ូលិសស្រុកផេសហាវើរបានប្រាប់ភ្នាក់ងារព័ត៌មានថា គោលដៅរបស់អ្នកបំផ្ទុះគ្រាប់បែកអត្តឃាតគឺបុគ្គលិកប៉ូលិស ហើយអ្នកបំផ្ទុះគ្រាប់បែកនោះបានលួចចូលទៅក្នុងទីតាំងសំខាន់ៗ មុនពេលបំផ្ទុះខ្លួនឯងនៅក្នុងវិហារអ៊ីស្លាមនោះ។
ក្រោយពេលមានហេតុការណ៍ផ្ទុះកើតឡើង មន្ទីរសុខាភិបាលខេត្តបានប្រកាសអាសន្ននៅក្នុងស្រុកផេសហាវើរ និងបានស្នើឱ្យបុគ្គលិកពេទ្យទាំងអស់បន្តបំពេញកាតព្វកិច្ច។ កម្លាំងសន្តិសុខមកចូលរួមរំលែកទុក្ខនៅក្នុងតំបន់ និងបានបើកការស៊ើបអង្កេតទៅលើឧបទ្ទវហេតុនោះ។ លោក រ៉ាហ៊ីម ខាន មានអាយុ ៣៥ឆ្នាំ ដែលជាប្រជាជនក្នុងតំបន់បាននិយាយថា លោកនៅក្នុងវិហារនោះ ក្រោយមកគាត់ឮសំឡេងក្តាំង បន្ទាប់មកឮសម្រែកយំរបស់អ្នករបួស។
លោក ខាន ប្រាប់អ្នកយកព័ត៌មានថា “នៅពេលនោះខ្ញុំស្ទើតែមិនជឿលើភ្នែករបស់ខ្ញុំ។ ខ្ញុំបានឃើញមនុស្សប្រឡាក់ឈាមនៅគ្រប់ទីកន្លែងស្រែកសុំជំនួយ។ នេះជាឧប្បត្តិហេតុដ៏អាក្រក់បំផុតក្នុងជីវិតរបស់ខ្ញុំ ហើយខ្ញុំនៅតែមានភាពភ័យតក់ស្លុតនៅឡើយ”។
លោក ស្ហាបាស់ ស្ហារីហ្វ នាយករដ្ឋមន្ត្រីប្រទេសប៉ាគីស្ថាន បានថ្កោលទោសចំពោះហេតុការណ៍ផ្ទុះនោះ ដោយលោកបាននិយាយថា ប្រជាជាតិទាំងមូលបាននិងកំពុងតែរួបរួមគ្នាប្រឆាំងនឹងការគំរាមកំហែងនៃអំពើភេរវកម្ម។
លោកបានបន្តទៀតថា“ក្រុមភេរវករចង់បង្កើតភាពភ័យខ្លាចដោយកំណត់គោលដៅទៅលើអ្នកដែលបំពេញកាតព្វកិច្ចការពារប្រទេសប៉ាគីស្ថាន ហើយយុទ្ធសាស្ត្រដ៏ទូលំទូលាយនឹងត្រូវបានអនុម័តដើម្បីប្រឆាំងនឹងស្ថានភាពសណ្តាប់ធ្នាប់ដែលកាន់តែយ៉ាប់យ៉ឺននៅក្នុងខេត្តខាយប័រផាកថុនវ៉ា ហើយរដ្ឋាភិបាលសហព័ន្ធនឹងជួយខេត្តនេះក្នុងការបង្កើនសមត្ថភាពប្រឆាំងភេរវកម្ម។”
ពុំទាន់មានក្រុមណាមួយអះអាងទទួលខុសត្រូវចំពោះការវាយប្រហារនេះនៅឡើយទេ៕
ប្រែសម្រួល៖ប៉ោក លក្ខិណា
ប្រភពព័ត៌មានXinhua ចុះផ្សាយថ្ងៃទី៣១ ខែមករា ឆ្នាំ២០២៣
