ប្រទេសប៉ាគីស្ថាន៖ តាមប្រភពពីមន្ត្រីអនុវត្តច្បាប់ក្នុងស្រុកបានឲ្យដឹងថា អាជ្ញាធរប៉ាគីស្ថានបានឃាត់ខ្លួនជនសង្ស័យ២៣នាក់ មានទាំងមន្ត្រីប៉ូលិសជាច្រើននាក់ដែលជាប់ពាក់ព័ន្ធនឹងករណីបំផ្ទុះគ្រាប់បែកនៅវិហារអ៊ីស្លាមមួយកន្លែងក្នុងខេត្តផេសហាវើរ នៃប្រទេសប៉ាគីស្ថាន។
ប្រភពបាននិយាយថា“ដើម្បីជាផ្នែកមួយនៃការស៊ើបអង្កេតអំពីរបៀបដែលគ្រឿងផ្ទុះគួរតែត្រូវបានបញ្ចប់នៅក្នុងតំបន់ហាមឃាត់ យើងក៏បានឃុំខ្លួនមន្ត្រីប៉ូលិសមួយចំនួនផងដែរ”។
ក្នុងចំណោមអ្នកជាប់ឃុំទាំង ២៣នាក់នោះ មានអ្នកស្រុកផេសហាវើរ និងប្រជាជនមួយចំនួនផ្សេងទៀតមកពីតំបន់ជាប់ព្រំដែនអាហ្វហ្គានីស្ថាន។
គួររំលឹកផងដែរថា កាលពីថ្ងៃចន្ទ អ្នកបំផ្ទុះគ្រាប់បែកអត្តឃាតម្នាក់បានធ្វើឲ្យផ្ទុះអំឡុងពេលធ្វើអធិស្ឋាននាពេលថ្ងៃត្រង់ក្នុងវិហារអ៊ីស្លាមដែលមានមនុស្សច្រើនកុះករ។ បើយោងតាមបច្ចុប្បន្នភាពព័ត៌មានចុងក្រោយបានឱ្យដឹងថា មនុស្ស១០១នាក់ស្លាប់ និងមិនតិចជាង២០០នាក់រងរបួស។ លើសពីនេះ អ្នកស្លាប់ភាគច្រើនគឺជាមន្ត្រីប៉ូលិស។ ក្រុមសកម្មប្រយុទ្ធ ថេរីកអ៊ី តាលីបង់ប៉ាគីស្ថាន ហៅកាត់ថា TTP ដែលជាក្រុមស្ថិតនៅក្រៅច្បាប់ក្នុងប្រទេសប៉ាគីស្ថាន និងមានទំនាក់ទំនងជាមួយចលនាតាលីបង់ដែលត្រូវបានហាមឃាត់ក្នុងប្រទេសរុស្ស៊ី បានអះអាងទទួលខុសត្រូវចំពោះហេតុការណ៍ផ្ទុះនេះ៕
ប្រែសម្រួល៖ប៉ោក លក្ខិណា
ប្រភពព័ត៌មាន TASS ចុះផ្សាយថ្ងៃទី០២ ខែកុម្ភៈ ឆ្នាំ២០២៣