ប្រទេសប៉ាគីស្ថាន៖ ប្រព័ន្ធផ្សព្វផ្សាយក្នុងតំបន់បានរាយការណ៍កាលពីល្ងាចថ្ងៃព្រហស្បតិ៍ថា នាយកដ្ឋានប្រឆាំងភេរវកម្ម ហៅកាត់ថា (CTD) របស់ប៉ូលិសនៅខេត្តផុនចាបភាគខាងកើតប្រទេសប៉ាគីស្ថាន បានបង្ក្រាបការវាយប្រហារភេរវកម្មដែលអាចនឹងកើតឡើងដោយចាប់បាន ក្រុមភេរវករ ២នាក់។
ប្រព័ន្ធផ្សព្វផ្សាយក្នុងស្រុកដែលដកស្រង់ចេញពីប្រភពផ្លូវការបានរាយការណ៍ថា នាយកដ្ឋានប្រឆាំងភេរវកម្ម និងភ្នាក់ងារស៊ើបការណ៍សម្ងាត់មួយបានធ្វើប្រតិបត្តិការ និងចាប់ខ្លួនពិរុទ្ធជននៅទីក្រុងរ៉ាវ៉ាល់ភីនឌី ដែលជាទីក្រុងយោធភូមិមួយស្ថិតនៅជាប់ទីក្រុងអ៊ីស្លាម៉ាបាដដែលជារាជធានីនៃប្រទេសប្រទេសប៉ាគីស្ថាន។
ក្រុមភេរវករដែលចាប់ខ្លួនបានទាំងនោះជាសមាជិករបស់ក្រុមភេរវករហាមឃាត់ ថេរ៉ីក អ៊ី តាលីបង់ប៉ាគីស្ថាន ដែលគ្រោងវាយប្រហារដោយមានជំនួយពីអ្នកបំផ្ទុះគ្រាប់បែកអត្តឃាត នៅទីតាំងចំនួន ៤ផ្សេងគ្នា រួមទាំងបរិវេណហ្វឹកហាត់របស់ប៉ូលិសក្នុងទីក្រុងអ៊ីស្លាម៉ាបាដ។
ក្នុងអំឡុងពេលស៊ើបអង្កេត នាយកដ្ឋានប្រឆាំងភេរវកម្មបានរកឃើញថា ក្រុមភេរវករធ្លាប់បានថតរូបភាព និងវីដេអូនៅកន្លែងដែលពួកគេបានកំណត់គោលដៅ។
កាលពីដើមសប្តាហ៍នេះ នាយកដ្ឋានប្រឆាំងភេរវកម្មបានអះអាងថាបានចាប់ខ្លួនក្រុមភេរវករធីធីភី (TTP) ៩នាក់មកពីតំបន់ផ្សេងគ្នានៃខេត្តផុនចាប និងបានរឹបអូសអាវុធ គ្រាប់រំសេវ និងគ្រឿងផ្ទុះជាច្រើនពីទីតាំងរបស់ពួកគេ៕
ប្រែសម្រួល៖ កញ្ញា ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៩ ខែកុម្ភៈ ឆ្នាំ២០២៣
