កាលពីថ្ងៃអង្គារ ស្ត្រីជនជាតិដាណឺម៉ាក-បូស្ន៊ី ម្នាក់ដែលបានជម្លៀសចេញពីជំរុំឃុំឃាំងស៊ីរីក្នុងឆ្នាំ២០២១ ត្រូវបានតុលាការស្រុកដាណឺម៉ាក ដកហូតសញ្ជាតិដាណឺម៉ាករបស់នាង និងកាត់ទោសអោយជាប់ពន្ធនាគាររយៈពេល ៤ឆ្នាំ ពីបទផ្តល់ជំនួយដល់ពួកសកម្មប្រយុទ្ធ ISIS ។ ស្ត្រីវ័យ ៣៨ឆ្នាំរូបនេះបានធ្វើដំណើរទៅប្រទេសស៊ីរីជាមួយស្វាមី និងកូនៗរបស់ខ្លួនក្នុងខែកុម្ភៈ ឆ្នាំ ២០១៥ ហើយបានធ្វើជាស្ត្រីមេផ្ទះនៅបន្ទាយរបស់ក្រុម ISIS នៅក្នុងទីក្រុងរ៉ាការ (Raqqa)។យោងតាមមេធាវីរបស់នាង អេលមីណា អាល់ជីក (Elmina Aljic) ដែលនៅមានសញ្ជាតិបូស្ន៊ី បានសារភាពនៅតុលាការថា នាងបានជួយក្រុមសកម្មប្រយុទ្ធដោយធ្វើការជាស្ត្រីមេផ្ទះ ។ មេធាវីបានបន្ថែមថា នាងមិនទាន់សម្រេចចិត្តនៅឡើយទេ ថាតើត្រូវប្តឹងឧទ្ធរណ៍ឬអត់។ នៅឆ្នាំ២០២១ ស្ត្រី ៣នាក់ និងកុមារ ១៤នាក់ត្រូវបានជម្លៀសចេញពីប្រទេសស៊ីរីទៅកាន់ប្រទេសដាណឺម៉ាក។ នៅពេលមកដល់ប្រទេសដាណឺម៉ាក ស្ត្រីទាំងនោះត្រូវបានចាប់ខ្លួន និងចោទប្រកាន់ពីបទជួយដល់អង្គការភេរវករ និងធ្វើដំណើរដោយខុសច្បាប់ទៅកាន់តំបន់មានជម្លោះ។ កាលពីឆ្នាំមុន ស្រ្តីម្នាក់ក្នុងចំណោមស្រ្តីទាំងបីនាក់នេះ ត្រូវបានកាត់ទោសជាប់ពន្ធនាគាររយៈពេល៣ឆ្នាំ។
ប្រភពព័ត៌មានពី ALARABIYA News ចេញផ្សាយថ្ងៃទី២៨ ខែកុម្ភៈ ឆ្នាំ២០២៣
ប្រែសម្រួល៖ លោក ងួន ណារិទ្ធ
