ប្រទេសប៉ាគីស្ថាន៖ មន្ត្រីនាយកដ្ឋានប្រឆាំងភេរវកម្មបាននិយាយថា នាយកដ្ឋានប្រឆាំង
ភេរវកម្ម ហៅកាត់ថា (CTD) របស់ប៉ូលិសក្នុងខេត្តផុនចាបភាគខាងកើតប្រទេសប៉ាគីស្ថាន
ចាប់ខ្លួនក្រុមភេរវករបាន ១៣នាក់ ក្នុងប្រតិបត្តិការដែលមានមូលដ្ឋានលើការស៊ើបការណ៍ដាច់ដោយឡែកពីគ្នា។
មន្ត្រីនាយកដ្ឋានប្រឆាំងភេរវកម្មបាននិយាយក្នុងសេចក្តីថ្លែងការណ៍មួយកាលពីថ្ងៃសៅរ៍ថា ក្រុមភេរវករដែលចាប់ខ្លួនបានទាំងនោះ មានមេបញ្ជាការជាន់ខ្ពស់ក្រុមភេរវករ ៣នាក់ដែលជាសមាជិករបស់ក្រុមសកម្មប្រយុទ្ធរដ្ឋអ៊ីស្លាមហាមឃាត់។ ប្រតិបត្តិការទាំងនេះត្រូវបានធ្វើឡើងនៅស្រុកផ្សេងគ្នានៅក្នុងខេត្ត។
មន្ត្រីនាយកដ្ឋានប្រឆាំងភេរវកម្មបានបន្ថែមទៀតថា ក្រុមភេរវករបានរៀបចំគម្រោងដើម្បីវាយប្រហារភេរវកម្មនៅក្នុងខេត្ត ប៉ុន្តែដោយសារការចាត់វិធានការទាន់ពេលវេលារបស់មន្ត្រីប៉ូលិសបានរារាំងគ្រោះមហន្តរាយដ៏ធំនេះ។
នៅក្នុងសេចក្តីថ្លែងការណ៍ដដែលមានខ្លឹមសារបន្ថែមថា “នាយកដ្ឋានប្រឆាំងភេរវកម្មបានធ្វើប្រតិបត្តិការដើម្បីពង្រឹងសុវត្ថិភាពខេត្តផុនចាប ហើយអាជ្ញាធរបានប្ដេជ្ញាដើម្បីលុបបំបាត់ការបំផ្លិចបំផ្លាញនៃអំពើភេរវកម្ម”។ មន្ត្រីនាយកដ្ឋានប្រឆាំងភេរវកម្មក៏បានរឹបអូសបានឃ្លាំងអាវុធ ដែលក្នុងនោះរួមមាន ឧបករណ៍បំផ្ទុះកែច្នៃ ឧបករណ៍បញ្ជាបំផ្ទុះ និងគ្រឿងផ្ទុះជាច្រើនក្នុងពេលប្រតិបត្តិការ។
មន្ត្រីប៉ូលិសបានដាក់បណ្តឹងផ្សេងៗគ្នាក្នុងករណីក្រុមភេរវករដែលចាប់ខ្លួនបាននោះ ដែលក្រោយមកបញ្ជូនពួកគេទៅកាន់ទីតាំងដែលមិនស្គាល់ដើម្បីស៊ើបអង្កេតបន្ថែមទៀត៕
ប្រភពព័ត៌មាន Xinhua ចុះផ្សាយថ្ងៃទី២០ ខែសីហា ឆ្នាំ២០២៣
