ប្រទេសអ៊ីរ៉ង់៖ លោក ណាសឺរ ខាណានី អ្នកនាំពាក្យក្រសួងការបរទេសអ៊ីរ៉ង់បាននិយាយកាលពីថ្ងៃចន្ទថា ក្រុមភេរវករប្រឆាំងនឹងប្រទេសអ៊ីរ៉ង់ដែលកំពុងធ្វើប្រតិបត្តិការនៅក្នុងតំបន់ឃឺដ
របស់អ៊ីរ៉ាក់ត្រូវតែដកហូតអាវុធ និងផ្លាស់ប្តូរទីតាំងចេញពីតំបន់ព្រំដែននៅត្រឹមថ្ងៃទី១៩ ខែកញ្ញា ខាងមុខ ដោយលោកសង្កត់ធ្ងន់ថា ថ្ងៃកំណត់នឹងមិនត្រូវបានពន្យារពេល។
យោងតាមភ្នាក់ងារសារព័ត៌មានរដ្ឋអាយអាអ៊ិនអេបានឱ្យដឹងថា លោក ខាណានី បានធ្វើអត្ថាធិប្បាយក្នុងអំឡុងសន្និសីទកាសែតជាទៀតទាត់របស់គាត់នៅក្នុងទីក្រុងតេហេរ៉ង់ ដែលលោក និយាយថា ប្រទេសអ៊ីរ៉ង់រំពឹងថា រដ្ឋាភិបាលអ៊ីរ៉ាក់នឹងអនុវត្តយ៉ាងពេញលេញនូវកិច្ចព្រមព្រៀងសន្តិសុខដែលបានចុះហត្ថលេខាជាមួយប្រទេសអ៊ីរ៉ង់កាលពីខែមីនា ដែលទាមទារឲ្យមានការរំសាយក្រុមបំបែកខ្លួន។
លោកនិយាយថា ប្រទេសអ៊ីរ៉ង់បានដឹងថារដ្ឋាភិបាលប្រទេសអ៊ីរ៉ាក់បានបញ្ជូនខ្លឹមសារនៃកិច្ចព្រមព្រៀងនេះទៅកាន់អាជ្ញាធរក្នុងតំបន់ឃឺដ ដោយលោកបានបន្ថែមថា ពេលនេះប្រទេសអ៊ីរ៉ង់កំពុងរង់ចាំការអនុវត្តកិច្ចព្រមព្រៀងនេះ។
តំបន់ឃឺដ ដែលជាតំបន់ពាក់កណ្តាលស្វយ័តនៅភាគខាងជើងប្រទេសអ៊ីរ៉ាក់ មានជំរំ និង
មូលដ្ឋាននានា ដែលដំណើរការដោយក្រុមចលនាឃឺដអ៊ីរ៉ង់មួយចំនួន ដែលប្រទេសអ៊ីរ៉ង់
ចាត់ទុកថាជាក្រុមភេរវករផ្តាច់ខ្លួន។
អ្នកនាំពាក្យរូបនេះបានបញ្ជាក់សារជាថ្មីពីជំហរម៉ឺងម៉ាត់របស់ប្រទេសអ៊ីរ៉ង់ដែលថា ថ្ងៃផុតកំណត់នឹងមិនត្រូវបានពន្យាពេល ដោយលោកបញ្ជាក់បន្ថែមថា រដ្ឋាភិបាលអ៊ីរ៉ាក់នៅក្នុងតំបន់ឃឺដ និងតំណាងពិសេសរបស់អង្គការសហប្រជាជាតិប្រចាំប្រទេសអ៊ីរ៉ាក់ សុទ្ធតែបានទទួលដំណឹងអំពីជំហររបស់ប្រទេសអ៊ីរ៉ង់។
លោក ខាណានី និយាយថា “ប្រទេសអ៊ីរ៉ង់រំពឹងថា រដ្ឋាភិបាលអ៊ីរ៉ាក់នឹងប្រតិបត្តិឱ្យបានត្រឹមត្រូវនូវបទប្បញ្ញត្តិនៃកិច្ចព្រមព្រៀងនេះ ខណៈដែលប្រទេសអ៊ីរ៉ង់បានដាក់ភាពសំខាន់បំផុតទៅលើការការពារសន្តិសុខជាតិរបស់ខ្លួន។ លោកបានព្រមានថា ប្រសិនបើលក្ខខណ្ឌនៃកិច្ចព្រមព្រៀងមិនត្រូវបានគេគាំទ្រ ប្រទេសអ៊ីរ៉ង់នឹងបំពេញការទទួលខុសត្រូវរបស់ខ្លួនក្នុងការការពារសន្តិសុខជាតិរបស់យើង។”
កិច្ចព្រមព្រៀងសន្តិសុខមួយដែលត្រូវបានចុះហត្ថលេខារវាងប្រទេសអ៊ីរ៉ង់ និងប្រទេសអ៊ីរ៉ាក់កាលពីខែមីនា តម្រូវឱ្យរដ្ឋាភិបាលអ៊ីរ៉ាក់បំបែកក្រុមឃឺដអ៊ីរ៉ង់ និងផ្លាស់ប្តូរទីតាំងរបស់ពួកគេទៅជំរំជំនួស៕
ប្រភព Xinhua ចុះផ្សាយថ្ងៃទី២៨ ខែសីហា ឆ្នាំ២០២៣
