ប្រទេសស៊ីរី៖ អ្នកតាមដានសង្គ្រាមបានរាយការណ៍កាលពីព្រឹកថ្ងៃសៅរ៍ ទី៩ ខែធ្នូ ថា ទាហាន ៧នាក់ និងក្រុមសកម្មប្រយុទ្ធគាំទ្ររដ្ឋាភិបាល ត្រូវបានសម្លាប់កាលពីថ្ងៃសុក្រ ទី៨ ខែធ្នូ នៅពេលក្រុមសកម្មប្រយុទ្ធរដ្ឋអ៊ីស្លាម (IS) វាយប្រហារលើទីតាំងយោធានៅភាគខាងកើតខេត្តឌៀរ អាល ហ្សួរ។
អ្នកឃ្លាំមើលសិទ្ធិមនុស្សក្នុងសង្រ្គាមស៊ីរីបាននិយាយថា ការវាយប្រហារនេះចាប់ផ្តើមពីលើទីតាំងយោធានៅខាងកើតស្ថានីយប្រេងធីធូ នៅតំបន់ជនបទភាគខាងត្បូងនៃខេត្តឌៀរ អាលហ្សួរ ដែលវាជាការវាយប្រហារចុងក្រោយនៅភាគខាងកើតប្រទេសស៊ីរី។
មកដល់ពេលនេះ ក្រុមឃ្លាំមើលសង្គ្រាមដែលមានមូលដ្ឋាននៅចក្រភពអង់គ្លេសបានកត់ត្រាចំនួនអ្នកស្លាប់ពីការវាយប្រហារប្រភេទនេះមានចំនួន ៥៩៤នាក់ ក្នុងនោះមានក្រុមសកម្មប្រយុទ្ធរដ្ខអ៊ីស្លាមចំនួន ៤៤នាក់ និងទាហាន រួមទាំងក្រុមសកម្មប្រយុទ្ធគាំទ្ររដ្ឋាភិបាលចំនួន ៣៨៥នាក់ និងមានជនស៊ីវិល ១៦៥នាក់ផងដែរ។
ក្រុមសកម្មប្រយុទ្ធរដ្ឋអ៊ីស្លាមបានបាត់បងតំបន់សំខាន់ៗនៅក្នុងប្រទេសស៊ីរី ហើយសមាជិកក្រុមប្រយុទ្ធរបស់ពួកគេត្រូវការដណ្តើមទីតាំងនោះមកវិញ និងលបវាយឆ្មក់ក្នុងព្រៃនៅតំបន់វាលខ្សាច់ដ៏ធំទូលាយនៃភាគខាងកើតប្រទេសស៊ីរី៕
ប្រភពព័ត៌មាន Xinhua ចុះផ្សាយថ្ងៃទី០៩ ខែធ្នូ ឆ្នាំ២០២៣
