រដ្ឋប៉ាឡេស្ទីន៖ កម្លាំងទ័ពអ៊ីស្រាអែលដែលហៅកាត់ថា (IDF) កាលពីថ្ងៃអង្គារ ទី២៨ ខែឧសភាបានបដិសេធមិនជាប់ពាក់ព័ន្ធនឹងការវាយប្រហារបំផ្ទុះគ្រាប់បែកនៅថ្ងៃអង្គារទៅលើជំរំនៅតំបន់ អាល ម៉ាវ៉ាស៊ី ក្បែរទីក្រុងរ៉ាហ្វា ដែលបានសម្លាប់មនុស្សយ៉ាងហោចណាស់ ២១នាក់ និងបង្ករបួសស្នាមដល់មនុស្សជាច្រើននាក់។
កម្លាំងទ័ពអ៊ីស្រាអែលនិយាយនៅក្នុងសេចក្តីថ្លែងការណ៍ថា៖ «សូមបដិសេធចំពោះរបាយការណ៍ប៉ុន្មានម៉ោងមុន កម្លាំងទ័ពអ៊ីស្រាអែលមិនបានវាយប្រហារតាមអាកាសនៅតំបន់មនុស្សធម៌ អាល ម៉ាវ៉ាស៊ីន»។
កម្លាំង IDF លើកឡើងថា ឃ្លាំងលាក់អាវុធអាចជាមូលហេតុពិតប្រាកដបង្កឱ្យមានការផ្ទុះនេះ។
កម្លាំងសន្តិសុខក្នុងតំបន់រ៉ាហ្វាបានប្រាប់អ្នកយកព័ត៌មានថា កាំភ្លើងធំអ៊ីស្រាអែលបានទម្លាក់គ្រាប់បែកទៅលើតង់របស់អ្នកផ្លាស់ទីលំនៅ នៅក្នុងតំបន់ អាល ម៉ាវ៉ាស៊ី ដែលជាតំបន់មនុស្សធម៌។ តំបន់នោះជាកន្លែងដែលជនផ្លាស់ទីលំនៅពីតំបន់ហ្កាហ្សាជ្រកកោណក្រោមបទបញ្ជារបស់កម្លាំងអ៊ីស្រាអែល។
ខាងវេជ្ជសាស្ត្រក្នុងតំបន់ប្រាប់អ្នកសារព័ត៌មានថា ការផ្ទុះគ្រាប់បែកនាំឱ្យមានការសម្លាប់មនុស្សយ៉ាងហោចណាស់ ២១នាក់ ក្នុងនោះមានទាំងស្ត្រី និងកុមារជាច្រើននាក់ និងរបួសជាច្រើននាក់។
មន្ត្រីសុខាភិបាលក្នុងតំបន់ហ្កាហ្សាបានលើកឡើងនៅក្នុងសេចក្តីថ្លែងការណ៍ថា យ៉ាងហោចណាស់មនុស្ស ៦៤នាក់រងរបួសក្នុងហេតុការណ៍ផ្ទុះគ្រាប់បែក ក្នុងនោះមានមនុស្ស ១០នាក់ ស្ថិតក្នុងស្ថានភាពធ្ងន់ធ្ងរ។
ហេតុការណ៍នេះបានកើតឡើងបន្ទាប់ពីមានការវាយប្រហារតាមអាកាសរបស់អ៊ីស្រាអែលទៅលើតង់របស់ជនស៊ីវិលដែលផ្លាស់ទីលំនៅ នៅភាគពាយ័ព្យនៃតំបន់រ៉ាហ្វា ដែលជាលទ្ធផលបណ្តាលឱ្យជនជាតិប៉ាឡេស្ទីនយ៉ាងហោចណាស់ ៤៥នាក់ស្លាប់ និងបង្ករបួសស្នាមដល់មនុស្សជាច្រើននាក់ផ្សេងទៀត។
ក្នុងការថ្លែងទៅកាន់សមាជិកសភាកាលពីថ្ងៃចន្ទ ទី២៧ ខែឧសភា ឆ្នាំ២០២៤ នាយករដ្ឋមន្ត្រីនៃប្រទេសអ៊ីស្រាអែល បេនចាម៉ីន ណេថានយ៉ាហុ (Benjamin Netanyahu) បានចាត់ទុកការវាយប្រហារកាលពីថ្ងៃចន្ទជារឿងអកុសលមានអ្វីមួយខុសប្រក្រតី និងបានសន្យាថានឹងស៊ើបអង្កេតសោកនាដកម្មនេះ៕
ប្រភព Xinhua ចុះផ្សាយថ្ងៃទី២៩ ខែឧសភា ឆ្នាំ២០២៤
