ប្រទេសអ៊ីរ៉ាក់៖ យោធាអ៊ីរ៉ាក់បាននិយាយកាលពីថ្ងៃអាទិត្យ ទី៨ ខែកក្កដា ថា កងកម្លាំងសន្តិសុខអ៊ីរ៉ាក់ចាប់ខ្លួនមេដឹកនាំជាន់ខ្ពស់ក្រុមសកម្មប្រយុទ្ធរដ្ឋអ៊ីស្លាមដែលទទួលខុសត្រូវក្នុងការវាយប្រហារបំផ្ទុះគ្រាប់បែកក្នុងរោងចក្រផលិតរថយន្ត។
យោងតាមរបាយការណ៍ចារកម្មបានឱ្យដឹងថា យោធាអ៊ីរ៉ាក់ និងកម្លាំងប៉ូលិសបានឡោមព័ទ្ធជនសង្ស័យក្នុងប្រតិបត្តិការមួយ ហើយបានចាប់ខ្លួនគាត់នៅក្នុងភូមិយូសូហ្វហ្វីយ៉ា ដែលមានចម្ងាយប្រមាណជា៣០គីឡូម៉ែត្រពីភាគខាងត្បូងទីក្រុងបាកដាដ នេះបើយោងតាមសេចក្តីថ្លែងការណ៍របស់មេបញ្ជាប្រតិបត្តិការក្រុងបាកដាដ។
នៅក្នុងសេចក្តីថ្លែងការណ៍មានខ្លឹមសារថា ជនសង្ស័យគឺជាអ្នកទទួលបន្ទុកក្នុងផ្នែកផលិតគ្រឿងផ្ទុះក្នុងក្រុមភេរវករ។
យ៉ាងណាមិញ លោកឧត្តមសេនីយ៍ សាដ អ៊ីប្រាហ៊ីម មកពីទីបញ្ជាការប្រាប់អ្នកសារព័ត៌មានថា សមាជិកក្រុមសកម្មប្រយុទ្ធដែលចាប់ខ្លួនបានគឺជាមេខ្លោងដ៏ធំមួយដែលកងកម្លាំងសន្តិសុខស្វែងរកតាមចាប់ខ្លួន ដែលគាត់ផលិតគ្រាប់បែកក្នុងរថយន្តជាច្រើនគ្រាប់ក្នុងគោលបំណងបំផ្ទុះទៅលើកងកម្លាំងសន្តិសុខ និងជនស៊ីវិល ដែលជាហេតុបណ្តាលឱ្យមនុស្សស្លាប់ និងរបួសជាច្រើននាក់ ។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរជាងមុន ចាប់តាំងពីកម្លាំងសន្តិសុខអ៊ីរ៉ាក់កម្ចាត់ក្រុមសកម្មប្រយុទ្ធរដ្ឋអ៊ីស្លាមក្នុងឆ្នាំ២០១៧។ ទោះបីជាយ៉ាងណាក៏ដោយក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់សំងំលាក់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀត និងបានវាយឆ្មក់ជាញឹកញាប់មកលើកម្លាំងសន្តិសុខ និងជនស៊ីវិល៕
