ប្រទេសតួកគី៖ ប្រធានាធិបតីតួកគីលោក រេសេព ថាយយ៉ីប អឺរដូហ្កាន បានប្រកាសកាលពីថ្ងៃសៅរ៍ ទី២០ ខែកក្កដា ស្តីពីការបញ្ចប់ដែលជិតមកដល់នៃប្រតិបត្តិការរបស់កម្លាំងតួកគីប្រឆាំងនឹងក្រុមសកម្មប្រយុទ្ធឃឺដនៅភាគខាងជើងប្រទេសអ៊ីរ៉ាក់ និងប្រទេសស៊ីរី។
«យើងនឹងបិទទីតាំងប្រតិបត្តិការនោះឆាប់ៗនេះនៅភាគខាងជើងប្រទេសអ៊ីរ៉ាក់»។ លោកអឺរដូហ្កានបានថ្លែងក្នុងអំឡុងកម្មវិធីបញ្ចប់ការសិក្សារបស់សាកលវិទ្យាល័យការពារជាតិនៅទីក្រុងអ៊ីស្តង់ប៊ុល។
ប្រទេសតួកគីបានបើកប្រតិបត្តិការខ្លរឡក់ (Claw-Lock) នៅភាគខាងជើងប្រទេសអ៊ីរ៉ាក់ កាលពីឆ្នាំ២០២២ ដោយកំណត់គោលដៅទៅលើទីតាំងលាក់ខ្លួនរបស់គណបក្សពលករឃឺដ (PKK) ខុសច្បាប់នៅក្នុងតំបន់មេធីណា ហ្សាប និងអាវ៉ាស៊ីនបេសៀន។
លោកប្រធានាធិបតីបានបញ្ជាក់ឱ្យដឹងថា អង្គភាពបំបែកខ្លួនគឺនឹងមិនអាចធ្វើសកម្មភាពណាមួយនៅតាមព្រំដែនប្រទេសតួកគី ខណៈដែលស្ថានភាពក្នុងប្រទេសអ៊ីរ៉ាក់ និងប្រទេសស៊ីរីកាន់តែមានភាពប្រសើរឡើង។
«នៅក្នុងប្រទេសស៊ីរី យើងនឹងបញ្ចប់ខ្សែរក្រវ៉ាត់សុវត្ថិភាពនៅតាមបណ្តោយព្រំដែនភាគខាងត្បូងរបស់យើង ដែលមានមូលដ្ឋានលើទឹកដីនៃប្រទេសស៊ីរី»។ នេះបើតាមប្រសាសន៍របស់លោកអឺដូហ្កាន ដែលបានសំដៅដល់ប្រតិបត្តិការរបស់ទាហានតួកគីនៅភាគខាងជើងប្រទេសស៊ីរីប្រឆាំងនឹងអង្គភាពការពារប្រជាជនឃឺដស៊ីរី (YGP)។
ចាប់តាំងពីឆ្នាំ២០១៦ មក ប្រទេសតួកគីបានផ្តួចផ្តើមប្រតិបត្តិការយោធាជាច្រើននៅភាគខាងជើងប្រទេសស៊ីរី ក្នុងគោលបំណងដើម្បីបង្កើតតំបន់គ្មានសមាជិករបស់អង្គភាពការពារប្រជាជនឃឺដស៊ីរី (YPG) នៅតាមបណ្តាយព្រំដែន។ ប្រទេសតួកគីបានចាត់ទុកសមាជិករបស់អង្គភាពការពារប្រជាជនឃឺដស៊ីរី (YPG) ជាសាខារបស់បក្សពលករឃឺដ(PKK)។
បក្សពលករឃឺដ (PKK) ដែលត្រូវបានចាត់ទុកថាជាអង្គភាពភេរវកម្មដោយប្រទេសតួកគី សហរដ្ឋអាមេរិក និងសហភាពអ៊ឺរ៉ុប បានធ្វើការបះបោរប្រឆាំងនឹងរដ្ឋាភិបាលតួកគីអស់រយៈពេលជាងបីទសវត្សរ៍មកហើយ៕
ប្រភព Xinhua ចុះផ្សាយថ្ងៃទី១៤ ខែកក្កដា ឆ្នាំ២០២៤
