ប្រទេសប៉ាគីស្ថាន៖ ទាហាន ២នាក់ និងជនស៊ីវិល ៥នាក់ រួមទាំងក្រុមភេរវករ ៣នាក់ ត្រូវបានសម្លាប់ក្នុងការវាយប្រហារភេរវករក្នុងខេត្តខាយប័រផាកថុនវ៉ា ភាគពាយ័ព្យប្រទេសប៉ាគីស្ថាន។ នេះបើតាមសេចក្តីថ្លែងការណ៍របស់ទាហានកាលពីថ្ងៃអង្ការ ទី១៦ ខែកក្កដា ឆ្នាំ២០២៤។
បណ្តាញទំនាក់ទំនងសាធារណៈអន្តរសេវាកម្មហៅកាត់ថា (ISPR) ដែលជាដៃគូរបស់ប្រព័ន្ធផ្សព្វផ្សាយកងទ័ពប៉ាគីស្ថានបានលើកឡើងនៅក្នុងសេចក្តីថ្លែងការណ៍ថា ភេរវករមួយក្រុមវាយប្រហារលើមណ្ឌលសុខភាពជនបទនៅតំបន់ គីរី ស្ហាមូហ្សាយ ក្នុងស្រុកដឺរ៉ា អ៊ីសម៉េល ខាន។
សេចក្តីថ្លែងការណ៍ដដែលមានខ្លឹមសារបន្ថែមថា ក្រុមភេរវករបានបើកការបាញ់ប្រហារទៅលើបុគ្គលិកមណ្ឌលសុខភាពបណ្តាលឲ្យពលរដ្ឋស្លូតត្រង់៥នាក់ស្លាប់ក្នុងនោះមានបុគ្គលិកពេទ្យស្រី២នាក់ ក្មេង២នាក់ និងអ្នកយាមម្នាក់។
ខ្លឹមសារបន្ថែមបង្ហាញថា កម្លាំងសន្តិសុខក្បែរតំបន់នោះបានធ្វើប្រតិបត្តិការសម្អាតភ្លាមៗ និងបានបាញ់បកយ៉ាងសកម្មទៅលើក្រុមភេរវករ បណ្តាលឲ្យក្រុមភេរវករ៣នាក់ស្លាប់នៅកន្លែងកើតហេតុ។
ប្រភពបន្ថែមថា ទោះជាយ៉ាងណាក៏ដោយ ក្នុងអំឡុងនៃការបាញ់ប្រហារគ្នាទៅវិញទៅមក ទាហាន២នាក់បាត់បង់ជីវិត ហើយប្រតិបត្តិការសម្អាតត្រូវបានធ្វើឡើងដើម្បីកម្ចាត់ក្រុមភេរវករផ្សេងទៀតនៅក្នុងតំបន់។
ខាងយោធានិយាយថា ជនល្មើសដែលបានប្រព្រឹត្តអំពើដ៏ឃោឃៅ និងយ៉ាងកំសាកមកលើជនស្លូតត្រង់ជាច្រើននាក់ ជាពិសេសលើស្ត្រី និងកុមារ នឹងត្រូវនាំយកទៅកាត់ទោស៕
ប្រភព Xinhua ចុះផ្សាយថ្ងៃទី១៦ ខែកក្កដា ឆ្នាំ២០២៤
