ប្រទេសតួកគី៖ កងកម្លាំងរបស់តួកគីបង្ក្រាបក្រុមភេរវករ៧នាក់នៅភាគខាងជើងប្រទេសស៊ីរី និងប្រទេសអ៊ីរ៉ាក់ នេះបើតាមមន្រ្តីក្រសួងការពារជាតិតួកគីប្រាប់អ្នកសារព័ត៌មាននៅថ្ងៃអង្គារ ទី១៦ ខែកក្កដា ឆ្នាំ២០២៤។
មន្ត្រីក្រសួងបានផុសលើបណ្តាញសង្គមអ៊ីក្សថា កម្លាំងប្រដាប់អាវុធតួកគីបង្ក្រាបសមាជិកគណបក្សពលករឃឺដ (PKK) ខុសច្បាប់ចំនួន៤នាក់ និងសមាជិកម្នាក់របស់អង្គភាពការពារប្រជាជនឃឺដស៊ីរី (YGP) ក្នុងប្រតិបត្តិការអឺប្រាត ស្ហែល (Euphrates Shield) នៅភាគខាងជើងប្រទេសស៊ីរី និងក្រុមភេរវករគណបក្សពលករឃឺដ(PKK) ៣នាក់ក្នុងតំបន់ ហាឃើក នៅភាគខាងជើងប្រទេសអ៊ីរ៉ាក់។
អាជ្ញាធរតួកគីជាញឹកញាប់បានប្រើពាក្យ “បង្ក្រាប” ដោយចង់សំដៅដល់ “ក្រុមភេរវករ” ដែលត្រូវបានសម្លាប់ រងរបួស និងត្រូវបានចាប់ខ្លួននៅក្នុងប្រតិបត្តិការរបស់ពួកគេ។
ចាប់តាំងពីឆ្នាំ ២០១៦មក កម្លាំងតួកគីបានធ្វើប្រតិបត្តិការជាច្រើនលើកនៅភាគខាងជើងប្រទេសស៊ីរី ដើម្បីបង្កើតតំបន់គ្មានសមាជិករបស់អង្គភាពការពារប្រជាជនឃឺដស៊ីរី (YPG) នៅតាមបណ្តាយព្រំដែន។ កាលពីឆ្នាំ២០២២ ប្រទេសតួកគីបានបើកប្រតិបត្តិការខ្លរឡក់ (Claw-Lock) នៅភាគខាងជើងប្រទេសអ៊ីរ៉ាក់ ដោយកំណត់គោលដៅទៅលើទីតាំងលាក់ខ្លួនរបស់គណបក្សពលករឃឺដ (PKK) ខុសច្បាប់នៅក្នុងតំបន់មេធីណា ហ្សាប និងអាវ៉ាស៊ីនបេសៀន ក្បែរព្រំដែនប្រទេសតួកគី។
បក្សពលករឃឺដ (PKK) ដែលត្រូវបានចាត់ទុកថាជាអង្គភាពភេរវកម្មដោយ ប្រទេសតួកគី សហរដ្ឋអាមេរិក និងសហភាពអ៊ឺរ៉ុប បានធ្វើការបះបោរប្រឆាំងនឹងរដ្ឋាភិបាលតួកគីអស់រយៈពេលជាងបីទសវត្សរ៍មកហើយ។
គួររំលឹកផងដែរថា ប្រទេសតួកគីចាត់ទុកសមាជិករបស់អង្គភាពការពារប្រជាជនឃឺដស៊ីរី ជាសាខារបស់គណបក្សពលករឃឺដ (PKK) ក្នុងប្រទសស៊ីរី៕
ប្រភព Xinhua ចុះផ្សាយថ្ងៃទី១៦ ខែកក្កដា ឆ្នាំ២០២៤
