ប្រទេសលីបង់៖ ក្រុមហេបូឡាបានចេញសេចក្តីថ្លែងការណ៍កាលពីថ្ងៃពុធ ទី៣១ ខែកក្កដា ឆ្នាំ២០២៤ ដើម្បីកាន់ទុក្ខមេបញ្ជាការយោធាកំពូលរបស់ពួកគេ លោក ហ្វូអេដ ស្ហូកឺ (Fouad Shokor) ដែលត្រូវបានសម្លាប់ដោយអ៊ីស្រាអែលនៅតំបន់ដាហ៊ី ជាយក្រុងបេរូត។
សេចក្តីថ្លែងការណ៍មានខ្លឹមសារ៖ «ការតស៊ូរបស់យើងបង្ហាញគាត់នូវនិមិត្តរូបនៃការប្ដេជ្ញាចិត្តយ៉ាងម៉ឺងម៉ាត់ និងការតាំងចិត្តយ៉ាងអង់អាចដើម្បីបន្តក្រុមជីហាដ រហូតទាល់តែមានការរំដោះទឹកដីនិងប្រជាជនពីភាពអយុត្តិធម៌ និងភាពឃោរឃៅនៃអង្គភាពដណ្តើមកាន់កាប់ ឧក្រិដ្ឋកម្ម និងឃាតកម្មនេះ។»
ការស្លាប់របស់លោក ហ្វូអឺត ស្ហូកឺ នឹងក្លាយជាកម្លាំងចិត្តដ៏ខ្លាំងក្លាសម្រាប់អ្នកប្រយុទ្ធទាំងអស់ក្នុងក្រុមរបស់គាត់ដើម្បីឆ្ពោះទៅមុខដោយភាពខ្ជាប់ខ្ជួន ភាពក្លាហាន ដើម្បីរក្សាសមិទ្ធិផល ជ័យជំនះ សមត្ថភាព និងដើម្បីសម្រេចបាននូវគោលដៅ និងក្តីសង្ឃឹមដែលមេដឹកនាំដ៏អស្ចារ្យ កំពុងតែទន្ទឹងរង់ចាំ។
យោងតាមសេចក្តីថ្លែងការណ៍បានឲ្យដឹងថា មេដឹកនាំក្រុមហេបូឡា លោក សេយេដ ហាសាន ណាសរ៉លឡាស់ (Sayyed Hassan Nasrallah) នឹងថ្លែងការណ៍នៅរសៀលថ្ងៃព្រហស្បតិ៍ ទី១ ខែសីហា ដើម្បីបង្ហាញពីជំហរនយោបាយរបស់ក្រុមហេបូឡាទាក់ទងនឹងការវាយប្រហារនេះ។
គួររំលឹកផងដែរថា យន្តហោះគ្មានមនុស្សបើករបស់អ៊ីស្រាអែលកាលពីថ្ងៃអង្គារបានវាយប្រហារដោយគ្រាប់មីស៊ីល ៣គ្រាប់ទៅលើទីតាំងមួយនៅក្បែរទីតាំងក្រុមប្រឹក្សាស្ហូរ៉ា(Shura) របស់ក្រុមហេបូឡា ដោយបានសម្លាប់លោក ហ្វូអេដ ស្ហូកឺ និងមនុស្ស ៥នាក់ផ្សេងទៀត រួមទាំងបង្ករបួសដល់មនុស្ស ៧៤នាក់ផ្សេងទៀត៕
