ប្រទេសលីបង់៖ ក្រសួងសុខាភិបាលលីបង់បានចេញសេចក្តីប្រកាសកាលពីថ្ងៃព្រហស្បតិ៍ ទី២២ ខែសីហា ឆ្នាំ២០២៤ ថា មនុស្សស្លាប់ ៥៦៤នាក់ និង១៨៤៨នាក់រងរបួសត្រូវបានស្រង់ចូលក្នុងកំណត់ត្រាចាប់តាំងពីថ្ងៃទី៨ ខែតុលា ឆ្នាំ២០២៣ ដល់ថ្ងៃអង្គារ ទី២០ ខែសីហា ឆ្នាំ២០២៤ ដោយសារតែការវាយឆ្មក់ និងការបាញ់ផ្លោងជាច្រើនគ្រាប់លើតំបន់ភាគខាងត្បូងប្រទេសលីបង់ និងទៅដល់តំបន់ជ្រលងបេកាភាគខាងកើតនៃប្រទេស។
របាយការណ៍ក្រសួងបង្ហាញថា អ្នករងរបួស ៨៤ភាគរយជាបុរស និង ៩៣ភាគរយក្នុងចំណោមនោះគឺជាជនជាតិលីបង់ និងអ្នករងរបួស ៥៣ភាគរយទៀតមានអាយុក្រោម ៤៤ឆ្នាំ។
អ្នករងរបួសដោយសារតែភ័យរន្ធត់មាន ៤២ភាគរយ អ្នករងរបួសដោយសារតែហេតុការណ៍ផ្ទុះមាន៤៣ភាគរយ អ្នករងរបួសដោយសារតែបានប៉ះពាល់ជាមួយសារធាតុគីមីមាន ១៥ភាគរយ។
នៅក្នុងរបាយការណ៍ដដែលបន្ថែមថា មនុស្សប្រមាណ ១១០ ០៩៩នាក់នៅក្នុងប្រទេសបានផ្លាស់ទីលំនៅកាលពីថ្ងៃសុក្រ ទី១៦ ខែសីហា ឆ្នាំ២០២៤។
ភាពតានតឹងនៅតាមព្រំដែនរវាងប្រទេសលីបង់និងប្រទេសអ៊ីស្រាអែលបានកើនឡើងចាប់តាំងពីថ្ងៃទី៨ ខែតុលា ឆ្នាំ២០២៣ បន្ទាប់ពីគ្រាប់រ៉ូកែតជាច្រើនគ្រាប់ត្រូវបានបាញ់ផ្លោងដោយក្រុមប្រដាប់អាវុធហេបូឡាលីបង់ចូលទីតាំងរបស់អ៊ីស្រាអែល ស្របពេលមានការវាយប្រហាររបស់ក្រុមហាម៉ាសទៅលើអ៊ីស្រអែលមុនមួយថ្ងៃ។ ក្រោយមកទៀតកងកម្លាំងអ៊ីស្រាអែលបានឆ្លើយតបវិញដោយបានបាញ់ផ្លោងយ៉ាងចាស់ដៃទៅលើតំបន់ភាគខាងត្បូងនៃប្រទេសលីបង់។
ស្ថានភាពជម្លោះកាន់តែមានភាពតានតឹងបន្ថែមទៀតបន្ទាប់ពីមានការវាយប្រហាររបស់អ៊ីស្រាអែលទៅលើតំបន់ជាយក្រុងដាហ៊ីភាគខាងត្បូងទីក្រុងបេរ៉ូត ដោយបានសម្លាប់មេបញ្ជាការជាន់ខ្ពស់ហេបូឡាលោក ហ្វូដ ស្ហូកក័រ និងជនស៊ីវិល ៧នាក់ផ្សេងទៀត។ លោក ហាសាន ណាស្រាឡាស់ អគ្គលេខាធិការក្រុមហេបូឡាសបានគំរាមវាយតបតវិញយ៉ាងច្បាស់លាស់ និងយ៉ាងឈឺចាប់ចំពោះការវាយឆ្មក់របស់អ៊ីស្រាអែលក្នុងពេលវេលាសមរម្យ និងឲ្យសាកសមនឹងទង្វើពួកគេ៕
ប្រភពព័ត៌មាន Xinhua ចុះផ្សាយថ្ងៃ២៣ ខែសីហា ឆ្នាំ២០២៤
