រដ្ឋប៉ាឡេស្ទីន៖ ជនជាតិប៉ាឡេស្ទីន ២នាក់ត្រូវបានសម្លាប់ និង១០នាក់ផ្សេងទៀតរងរបួសក្នុងប្រតិបត្តិការយោធានៅទីក្រុងថូលក្រាមភាគខាងជើងតំបន់វ៉េសប៉េង នេះបើយោងតាមប្រភពពីប៉ាឡេស្ទីន និងអ៊ីស្រាអែលប្រាប់អ្នកសារព័ត៌មាននៅថ្ងៃអង្គារ ទី១០ ខែកញ្ញា ឆ្នាំ២០២៤នេះ។
ជនរងគ្រោះម្នាក់ត្រូវបានបាញ់សម្លាប់ត្រង់ក្បាល ខណៈដែលម្នាក់ផ្សេងទៀតដែលជាស្ត្រីឈឺចាប់ដោយជំងឺដាច់សសៃឈាមខួរក្បាលធ្ងន់ធ្ងរ ហើយបានស្លាប់ភ្លាមៗនៅក្បែរកន្លែងបាញ់ប្រហារ និងផ្ទុះនោះ។ នេះបើយោងតាមប្រភពលោក រ៉ាដវ៉េន ប្លេប្លា ប្រធានសមាគម៍គ្រូពេទ្យប្រចាំនៅទីក្រុងថូលក្រាមប្រាប់អ្នកសារព័ត៌មាន។
សាកសពទាំងអស់ត្រូវបានបញ្ជូនទៅមន្ទីពេទ្យក្នុងតំបន់នេះបើយោងតាម សេចក្តីថ្លែងការណ៍របស់មន្ត្រីក្រសួងសុខាភិបាល។
យោងតាមប្រភពពីជនជាតិប៉ាឡេស្ទីនដែលនៅតំបន់នោះបានឱ្យដឹងថា កងកម្លាំងអ៊ីស្រាអែលសម្រុកចូលទីក្រុងថូលក្រាមឡោមព័ទ្ធមន្ទីរពេទ្យដោយមានទាំងការបាញ់កាំភ្លើង និងការបំផ្លិចបំផ្លាញហេដ្ឋារចនាសម្ព័ន្ធនៅតាមដងផ្លូវទៅជំរំជនភៀសខ្លួនក្នុងទីក្រុងដោយប្រើគ្រឿងចក្រឈូសឆាយរបស់យោធា។
ទន្ទឹមនឹងនេះផងដែរ លោក អាវីឆាយ អាដ្រេ អ្នកនាំពាក្យទាហានអ៊ីស្រាអែលបាននិយាយនៅក្នុងសេចក្តីថ្លែងការណ៍ថា កងកម្លាំងមួយចំនួនធំមកពីសេវាកម្មសន្តិសុខផ្ទៃក្នុងរបស់អ៊ីស្រាអែល ស្ហីន បេត និងប៉ូលិសព្រំដែនអ៊ីស្រាអែលគឺកំណត់គោលដៅវាយប្រហារទៅលើរចនាសម្ព័ន្ធរបស់ក្រុមភេរវករនៅក្នុងទីក្រុងថូលក្រាម ដែលនេះគឺជាផ្នែកមួយនៃប្រតិបត្តិការដែលកំពុងដំណើរការក្នុងការប្រឆាំងនឹង «ភេរវកម្ម» នៅក្នុងតំបន់វ៉េសបេង។នៅក្នុងសេចក្តីថ្លែងការណ៍មិនបានផ្តល់ព័ត៌មានលម្អិតបន្ថែមអំពីប្រតិបត្តិការនេះទេ។
អ៊ីស្រាអែលបានបើកប្រតិបត្តិការទ្រង់ទ្រាយធំនៅទូទាំងភាគខាងជើងតំបន់វ៉េសបេងកាលពីថ្ងៃទី២៨ ខែសីហា ដោយបានលើកឡើងថា ប្រតិបត្តិការនេះមានគោលបំណងដើម្បីតាមចាប់ខ្លួនក្រុមភេរវករ និងការពារសកម្មភាពវាយប្រហារប្រឆាំងនឹងអ៊ីស្រាអែលនាពេលអនាគត។
ប្រតិបត្តិការដែលត្រូវបានគេរាយការណ៍ថាមានរយៈពេល១០ថ្ងៃនេះ កំណត់គោលដៅវាយប្រហារចម្បងទៅលើទីក្រុងជេននីន ទីក្រុងថូបាស ទីក្រុងថូលក្រាម និងជំរំរបស់ពួកគេផងដែរ។ ហើយប្រតិបត្តិការនេះបានសម្លាប់ជនជាតិប៉ាឡេស្ទីនជិត ៤០នាក់ បង្ករបួសស្នាមដល់មនុស្ស ១៤៥នាក់ និងបំផ្លាញហេដ្ឋារចនាសម្ព័ន្ធក្នុងស្រុក និងអគារលំនៅដ្ឋានយ៉ាងធ្ងន់ធ្ងរ។
យោងតាមមន្ត្រីក្រសួងសុខាភិបាលបានឱ្យដឹងថា ជនជាតិប៉ាឡេស្ទីនមិនតិចជាង ៦៩០នាក់នោះទេដែលត្រូវបានសម្លាប់ក្នុងការវាយប្រហាររបស់អ៊ីស្រាអែលនៅទូរទាំងតំបន់វ៉េសបេងចាប់តាំងពីកើតមានជម្លោះរវាងប៉ាឡេស្ទីន និងអ៊ីស្រាអែលនៅតំបន់ហ្កាហ្សាស្ទ្រីប កាលពីខែតុលា ឆ្នាំមុន៕
ប្រភពព័ត៌មាន Xinhua ចុះផ្សាយថ្ងៃទី០៩ ខែកញ្ញា ឆ្នាំ២០២៤
