ប្រទេសអ៊ីស្រាអែល៖ យ៉ាងហោចណាស់ជនជាតិប៉ាឡេស្ទីន ១៥នាក់ត្រូវបានសម្លាប់ក្នុងការវាយប្រហាររបស់អ៊ីស្រាអែលទៅលើភាគខាងត្បូង និងភាគកណ្តាលនៃតំបន់ហ្កាហ្សាស្ទ្រីបនៅថ្ងៃចន្ទ ទី១៦ ខែកញ្ញា ឆ្នាំ២០២៤ នេះបើតាមប្រភពពីជនជាតិប៉ាឡេស្ទីន។
កងកម្លាំងសន្តិសុខប៉ាឡេស្ទីនប្រាប់អ្នកយកព័ត៌មានថា យន្តហោះចម្បាំងអ៊ីស្រាអែលកំណត់គោលដៅវាយប្រហារលើផ្ទះមួយខ្នងនៅក្នុងជំរំជនភៀសខ្លួននូសៀរ៉ាតនៅកណ្តាលហ្កាហ្សាស្ទ្រីប ដែលបានសម្លាប់មនុស្សយ៉ាងហោចណាស់ ១០នាក់។
ការវាយប្រហារតាមអាកាសបំផ្លាញផ្ទះមួយខ្នងទាំងស្រុង និងផ្ទះជាច្រើនខ្នងក្បែរនោះរងការខូចខាត។
ជនរងគ្រោះមានក្មេងៗជាច្រើននាក់ នេះបើតាមខាងមន្ទីពេទ្យបានប្រាប់មកអ្នកយកព័ត៌មាន។ អ្នករងរបួស ១៥នាក់ផ្សេងទៀតត្រូវបានបញ្ចូនទៅកាន់មន្ទីពេទ្យក្នុងស្ថានភាពរបួសមានកម្រិតខុសគ្នា។
នៅដដែលនោះផងដែរ ការបាញ់ផ្លោងរបស់អ៊ីស្រាអែលមួយផ្សេងទៀតទៅលើហាងដុតនាំមួយកន្លែង ក្នុងតំបន់ អាល ម៉ាវ៉ាស្ហី ភាគខាងលិចទីក្រុងខានយូនីស នៅភាគខាងត្បូងតំបន់ហ្កាហ្សាស្ទ្រីបបានសម្លាប់ជនជាតិប៉ាឡេស្ទីនយ៉ាងហោចណាស់ ៥នាក់ក្នុងនោះមានក្មេងម្នាក់ និងមនុស្សជាច្រើននាក់រងរបួស នេះបើយោងតាមប្រភពពីសន្តិសុខ និងពីខាងមន្ទីពេទ្យ។
រហូតមកដល់ពេលនេះ កងទ័ពអ៊ីស្រាអែលមិនទាន់ចេញសេចក្តីអត្ថាធិប្បាយទៅលើការវាយប្រហារទាំង២នេះនៅឡើយទេ។
គួររំលឹកផងដែរថា អ៊ីស្រាអែលបានបើកការវាយប្រហារទ្រង់ទ្រាយធំប្រឆាំងនឹងក្រុមហាម៉ាសនៅក្នុងតំបន់ហ្កាហ្សាដើម្បីសងសឹកនឹងការវាយប្រហាររបស់ក្រុមនេះនៅតាមបណ្តោយព្រំដែន កាលពីថ្ងៃទី៧ ខែតុលា ឆ្នាំ២០២៣ ដែលនៅពេលនោះ មានមនុស្សប្រមាណជា ១២០០នាក់ត្រូវបានសម្លាប់ និងច្រើនជាង ២៥០នាក់ផ្សេងទៀតត្រូវបានចាប់ជាចំណាប់ខ្មាំង។
បុគ្គលិកសុខាភិបាលដែលមានមូលដ្ឋាននៅតំបន់ហ្កាហ្សានិយាយនៅក្នុងសេចក្តីថ្លែងការណ៍នៅថ្ងៃចន្ទ ទី១៦ ខែកញ្ញា ឆ្នាំ២០២៤នេះថា ចំនួនជនជាតិប៉ាឡេស្ទីនស្លាប់ដោយការវាយប្រហារជាបន្តបន្ទាប់របស់អ៊ីស្រាអែលនៅតំបន់ហ្កាហ្សាបានកើនឡើងដល់ចំនួន ៤១២២៦នាក់៕
ប្រភពព័ត៌មាន Xinhua ចុះផ្សាយថ្ងៃទី១៧ ខែកញ្ញា ឆ្នាំ២០២៤
