ប្រទេសអ៊ីរ៉ាក់៖ វាយប្រហារតាមអាកាសដោយយន្តហោះគ្មានមនុស្សបើករបស់តួនៅថ្ងៃចន្ទ ទី១៦ ខែកញ្ញា ឆ្នាំ២០២៤ បានសម្លាប់សមាជិកម្នាក់របស់គណបក្សពលករឃឺដ (PKK) និងបង្ករបសួស្នាមដល់មនុស្ស២នាក់ផ្សេងទៀតនៅភាគខាងជើងខេត្តនីនីវ៉េ ប្រទេសអ៊ីរ៉ាក់ នេះបើតាមសេចក្តីថ្លែងការណ៍របស់សេវាកម្មប្រឆាំងភេរវកម្ម (CTS) នៃតំបន់ឃឺដពាក់កណ្តាលស្វយ័ត។
នៅក្នុងសេចក្តីថ្លែងការណ៍បន្ថែមថា ការវាយប្រហារតាមអាកាសកើតឡើងនៅម៉ោង ៩:៤នាទីម៉ោងក្នុងតំបន់ ពេលដែលយន្តហោះគ្មានមនុស្សបើករបស់តួគីបានវាយប្រហារលើក្រុមសកម្មប្រយុទ្ធឃឺដដែលប្រមូលផ្តុំនៅជំរំជនភៀសខ្លួនម៉ាកមួរ ភាគអាគ្នេយ៍ទីក្រុងម៉ូសូល។
កងកម្លាំងតួកគីតែងធ្វើប្រតិបត្តិការឆ្លងដែនជាប្រចាំដោយកំណត់គោលដៅលើក្រុមសកម្មប្រយុទ្ធគណបក្សពលករឃឺដនៅភាគខាងជើងអ៊ីរ៉ាក់ ហើយផ្តោតជាពិសេសលើភ្នំឃ្វានឌីល ដែលជាមូលដ្ឋានដ៏រឹងមាំរបស់ក្រុមនេះ។
គួរបញ្ជាក់ផងដែរថា គណបក្សពលករឃឺដដែលបានចុះក្នុងបញ្ចីអង្គការភេរវករដោយប្រទេតួកគី សហរដ្ឋអាមេរិក និងសហភាពអ៊ឺរ៉ុប បានបះបោរប្រឆាំងរដ្ឋាភិបាលតួកគីអស់រយៈពេលជាង៣០ឆ្នាំមកហើយ៕
ប្រភព Xinhua ចុះផ្សាយថ្ងៃទី១៦ ខែកញ្ញា ឆ្នាំ២០២៤
