រដ្ឋប៉ាឡេស្ទីន៖ ចំនួនអ្នកស្លាប់ដោយសារអំពើប្រល័យពូជសាសន៍អំឡុងពេលកាន់កាប់របស់អ៊ីស្រាអែលរយៈពេលជាង១១ខែនៅតំបន់ហ្កាហ្សាស្ទ្រីបមកដល់ពេលនេះសរុបមានចំនួន៤១៤៣១នាក់ និងរបួស ៩៥៨១៨នាក់ នេះបើយោងតាមសេចក្តីប្រកាសរបស់ក្រសួងសុខាភិបាលប៉ាឡេស្ទីន។
ក្រសួងបាននិយាយនៅក្នុងសេចក្តីថ្លែងការណ៍ថា កងកម្លាំងត្រួតត្រារបស់អ៊ីស្រាអែលហៅកាត់ថា (IOF) នៅតែបន្តរារាំងរថយន្តសង្គ្រោះបន្ទាន់និងក្រុមការងារការពារជនស៊ីវិលចូលទៅសង្គ្រោះជនរងគ្រោះរាប់សិបនាក់ដែលជាប់នៅក្រោមគំនរបាក់បែក និងរាយប៉ាយតាមដងផ្លូវ។
មន្ត្រីក្រសួងបានគូសបញ្ញាក់ថា IOF បានប្រព្រឹត្តសកម្មភាពសម្លាប់រង្គាលចំនួន៣លើកទៅលើគ្រួសារជនជាតិប៉ាឡេស្ទីននៅក្នុងតំបន់ហ្កាហ្សាស្ទ្រីបក្នុងរយៈពេល២៤ម៉ោងដែលបានសម្លាប់ជនស៊ីវិល ៤០នាក់ និងបង្ករបួសស្នាមដល់ ៥៨នាក់ផ្សេងទៀត។
IOF នៅតែបន្តប្រព្រឹត្តឧក្រិដ្ឋកម្ម រហូតដល់ថ្ងៃទី៣៥២នៃអំពើប្រល័យពូជសាសន៍ទៅលើជនជាតិប៉ាឡេស្ទីននៅតំបន់ហ្កាហ្សាស្ទ្រីប ដែលបង្កើតឲ្យមានមហន្តរាយមនុស្សធម៌តាមមិនធ្លាប់មានពីមុនមក តាមរយៈការវាយប្រហារតាមអាកាស ការទម្លាក់គ្រាប់បែក និងការបាញ់កាំភ្លើងធំពីគ្រប់ទិសទីមានទាំងលើដី តាមអាកាស និងលើសមុទ្រ ក៏ដូចជាការសម្លាប់រង្គាល និងកាកាត់ផ្តាច់គ្រប់មធ្យោបាយដើម្បីដឹកជញ្ជូនផ្គត់ផ្គង់ អាហារ ទឹក ថ្នាំ និងប្រេងឥន្ធនៈនានា ទៅជួយដល់ជនស៊ីវិល ស្របពេលដែលក្រុមប្រឹក្សាសន្តិសុខអង្គការសហប្រជាជាតិខ្វះការយកចិត្តទុកដាក់ និងគ្មានបញ្ជាពីតុលាការយុត្តិធម៌អន្តរជាតិដើម្បីបញ្ឈប់អំពើប្រល័យពូជសាសន៍ជាបន្ទាន់នេះ៕
ប្រភព QNA ចុះផ្សាយថ្ងៃទី២២ ខែកញ្ញា ឆ្នាំ២០២៤
