រដ្ឋប៉ាឡេស្ទីន៖ យ៉ាងហោចណាស់ជនជាតិប៉ាឡេស្ទីន ៨នាក់ស្លាប់ក្នុងការវាយប្រហារតាមអាកាសរបស់អ៊ីស្រាអែលទៅលើអគារលំនៅដ្ឋានមួយកន្លែងនៅក្នុងជំរំជនភៀសខ្លួន អាល ណឺសៀរ៉ាត នៅកណ្តាលតំបន់ហ្កាហ្សាស្ទ្រីប នេះបើតាមប្រភពប៉ាឡេស្ទីនប្រាប់អ្នកសារព័ត៌មាននៅថ្ងៃអង្គារ ទី២៤ ខែកញ្ញា ឆ្នាំ២០២៤នេះ។
តាមប្រភព និងសាក្សីនៅកន្លែងកើតហេតុប្រាប់អ្នកយកព័ត៌មានថា យន្តហោះចម្បាំងអ៊ីស្រាអែលវាយប្រហារសំដៅទៅលើផ្ទះមួយកន្លែងដែលមានទីតាំងនៅក្បែរតំបន់អាលី ឃ្លឹប នៅក្នុងជំរំ។ បុគ្គលិកមន្ទីពេទ្យបានបញ្ជាក់ឱ្យដឹងថា ការវាយឆ្មក់របស់អ៊ីស្រាអែលបានសម្លាប់មនុស្ស ៨នាក់ និងមនុស្សជាច្រើននាក់ផ្សេងទៀតដែលរងរបួសត្រូវបានបញ្ជូនទៅពេទ្យ អាល អាវដា ក្នុងជំរំ។
យោធាអ៊ីស្រាអែលមិនទាន់ធ្វើសេចក្តីអត្ថាធិប្បាយជុំវិញហេតុការណ៍នេះនៅឡើយទេ។
ការវាយប្រហារនេះគឺជាផ្នែកមួយនៃការវាយលុកទ្រង់ទ្រាយធំរបស់អ៊ីស្រាអែលប្រឆាំងនឹងក្រុមហាម៉ាសក្នុងតំបន់ហ្កាហ្សាដើម្បីសងសឹកចំពោះការវាយប្រហាររបស់ក្រុមហាម៉ាសដែលបានរំលោភលើព្រំដែនភាគខាងត្បូងប្រទេសអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ បង្ករឲ្យមានមនុស្សប្រមាណជា ១.២០០នាក់ស្លាប់ និងមិនតិចជាង ២៥០នាក់ផ្សេងទៀតត្រូវបានចាប់ជាចំណាប់ខ្មាំង។
ក្នុងរយៈពេល ២៤ម៉ោងកន្លងទៅនេះ យោធាអ៊ីស្រាអែលបានសម្លាប់មនុស្ស ១២នាក់ និងបង្ករបួសស្នាមដល់មនុស្ស ៤៣នាក់ ដែលនាំឲ្យចំនួនមនុស្សស្លាប់កើនឡើងដល់ ៤១.៤៦៧នាក់ និងបង្ករបួសស្នាមដល់មនុស្ស ៩៥.៩២១នាក់ចាប់តាំងពីមានជម្លោះរវាងអ៊ីស្រាអែលនិងប៉ាឡេស្ទីន នេះបើតាមសម្តីបុគ្គលិកសុខាភិបាលដែលមានមូលដ្ឋាននៅតំបន់ហ្កាហ្សានិយាយក្នុងសេចក្តីថ្លែងការណ៍នៅថ្ងៃអង្គារ ទី២៤ ខែកញ្ញា ឆ្នាំ២០២៤៕
ប្រភពព័ត៌មាន Xinhua ចុះផ្សាយថ្ងៃទី២៥ ខែកញ្ញា ឆ្នាំ២០២៤
