ប្រទេសលីបង់៖ ក្រុមហេបូឡាបាននិយាយថា ពួកគេបានវាយប្រហារតាមអាកាសទៅលើអង្គភាពស្ហាយ៉េតថេត១៣របស់ទីបញ្ជាការកងទ័ពជើងទឹកអ៊ីស្រាអែល ដែលនៅមូលដ្ឋានទ័ពជើងទឹកអាតលីតនៅលើឆ្នេរសមុទ្រមេឌីទែរ៉ាណេ ។
ការវាយប្រហារត្រូវបានធ្វើឡើងដោយយន្តហោះគ្មានមនុស្សបើកជាច្រើនគ្រឿង ដែលអាចវាយប្រហារគោលដៅដែលបានកំណត់ទុក នេះបើតាមក្រុមហេបូឡានិយាយនៅក្នុងបណ្តាញសង្គមតេលេក្រាម។
នៅថ្ងៃទី១៧-១៨ ខែកញ្ញា ហេតុការណ៍ផ្ទុះជាច្រើនដោយប្រើប្រាស់ឧបករណ៍ទំនាក់ទំនង និងឧបករណ៍អេឡិចត្រូនិកបានកើតឡើងពាសពេញប្រទេសលីបង់ ដែលជាហេតុបង្កឲ្យមានរលកកំហឹងថ្មីរវាងអ៊ីស្រាអែល និងក្រុមហេបូឡា។ ក្រុមហេបូឡាបានបន្ទោសអ៊ីស្រាអែលចំពោះហេតុការណ៍ទាំងនេះ។
អ៊ីស្រាអែលមិនបានធ្វើសេចក្តីអធិប្បាយដោយផ្ទាល់អំពីគ្រឿងផ្ទុះកែច្នៃទាំងនោះទេ ប៉ុន្តែពួកគេប្រកាសថា សកម្មភាពទាំងនោះគឺជាការបង្កើនប្រតិបត្តិការយោធានៅតំបន់ភាគខាងជើង។ ក្រោយមក កងទ័ពអាកាសអ៊ីស្រាអែលបានចាប់ផ្តើមវាយប្រហារតាមអាកាសទ្រង់ទ្រាយធំទៅលើតំបន់ភាគខាងត្បូងប្រទេសលីបង់ ឆ្លងព្រំដែនភាគខាងជើង និងបានវាយប្រហារលើទីក្រុងបេរូតផងដែរ។
រដ្ឋមន្ត្រីក្រសួងការពារជាតិអ៊ីស្រាអែលលោក យ៉ាវ ហ្កាឡេន បានប្រកាសបង្កើនការវាយប្រហារតាមអាកាសទៅលើទីតាំងយោធាជាច្រើនកន្លែង ឃ្លាំងផ្ទុកគ្រាប់រ៉ូកែត និងទីតាំងមេបញ្ជាការហេបូឡានៅទូទាំងប្រទេសលីបង់។ ចំនួនអ្នកស្លាប់ដោយសារការវាយប្រហារតាមអាកាសមានចំនួនលើសពី៥៥០នាក់នៅក្នុងប្រទេសលីបង់ ចំណែកឯមនុស្សមិនតិចជាង ១.៨០០នាក់ផ្សេងទៀតរងរបួស៕
ប្រភពព័ត៌មាន TASS ចុះផ្សាយថ្ងៃទី២៥ ខែកញ្ញា ឆ្នាំ២០២៤
