បុរសម្នាក់អាយុ ២១ឆ្នាំ ត្រូវបានតុលាការកាត់ទោសឱ្យជាប់ពន្ធនាគារពីបទបង្ហោះ និងចែករំលែកមាតិកាភេរវកម្មនៅលើអនឡាញ ដែលនេះគឺជាលទ្ធផលនៃការស៊ើបអង្កេតប្រកបដោយប្រសិទ្ធភាពរបស់ប៉ូលិសក្រុងប្រឆាំងភេរវកម្ម។
ការស៊ើបអង្កេតមួយដឹកនាំដោយបញ្ជាការដ្ឋានប្រឆាំងភេរវកម្មក្រុង លាតត្រដាងអំពីសកម្មភាពរបស់ អាយ៉ុប ណាសៀរ អាយុ ២១ឆ្នាំ កើតថ្ងៃទី២៦ ខែកក្កដា ឆ្នាំ២០០៣ រស់នៅភាគនិរតីទីក្រុងឡុងដ៍បានបង្ហោះសម្ភារៈភេរវកម្មលើគណនី និងថ្នាលប្រព័ន្ធផ្សព្វផ្សាយសង្គមផ្សេងៗគ្នាក្នុងអំឡុងឆ្នាំ២០២២ និងឆ្នាំ២០២៣។
ណាសៀរ ត្រូវបានកាត់ទោសនៅតុលាកា ឃីងស្តុន ក្រោន នៅថ្ងៃអង្គារ ទី២៤ ខែកញ្ញា ឆ្នាំ២០២៤ ឱ្យជាប់ពន្ធនាគារ ៦ឆ្នាំ ៩ខែ។
មេបញ្ជាការស្តីទីនៃបញ្ជាការដ្ឋានកម្លាំងប្រឆាំងភេរវកម្មក្រុង លោក ហ្ការ៉េត រ៉ីស បាននិយាយថា យើងដឹងពីផលប៉ះពាល់នៃការរីករាលដាលនៃសម្ភារៈភេរវកម្មនៅលើអនឡាញ អាចមានឥទ្ធិពលលើបុគ្គលដែលងាយរងគ្រោះដែលពួកគេអាចប្រឈមនឹងហានិភ័យនៃការអូសទាញឱ្យចូលក្នុងសកម្មភាពភេរវកម្ម។ ការងារដែលចូលក្នុងការសើបអង្កេតនេះបង្ហាញថាតើយើងយកចិត្តទុកដាក់កម្រឹតណាលើរាល់សកម្មភាពភេរវកម្មលើប្រព័ន្ធអនឡាញ ហើយយើងនឹងបន្តស្វែងរកបុគ្គលណាដែលចែកចាយសម្ភារៈទាំងនេះលើប្រព័ន្ធអនឡាញ។
នៅពេលដែលមន្ត្រីបានដឹងថា ណាសៀរ បានចែកចាយសម្ភារៈដែលពាក់ព័ន្ធនឹងការប្រព្រឹត្តអំពើភេរវកម្មនៅលើប្រព័ន្ធអនឡាញ ក៏ឈានទៅដល់ការចាប់ខ្លួន ណាសៀរ ហើយរឹបអូសយកឧបករណ៍អេឡិចត្រូនិចក្នុងខែតុលា ឆ្នាំ២០២៣ ក្នុងផ្ទះរបស់គាត់នៅភាគនិរតីនៃទីក្រុងឡុងដ៍។ សមត្ថកិច្ចបានត្រួតពិនិត្យឧបករណ៍របស់ ណាសៀរ និងបានរកឃើញថា ណាសៀរ មិនត្រឹមតែចែកចាយសម្ភារៈដើម្បីជួយផ្សព្វផ្សាយដល់ក្រុមភេរវករដែស្ហ (Daesh) នោះទេ គាត់ថែមទាំងមានឯកសារជាច្រើនដែលទំនងជាមានប្រយោជន៍ដល់អ្នកដែលប្រព្រឹត្តឬរៀបចំអំពើភេរវកម្មផងដែរ។
ជាពិសេស អ្នកស៊ើបអង្កេតបានរកឃើញថាគាត់មានឯកសារផ្សេងទៀតដែលណែនាំអំពីរបៀបផលិតថ្នាំពុល ឬសារធាតុពុលដែលអាចបង្កគ្រោះថ្នាក់ដល់សុខភាព ក៏ដូចជាឯកសារ ផ្សេងៗទៀត ដែលបង្ហាញអំពីរបៀបអនុវត្ត និងផ្តល់ដំបុន្មានជាក់ស្តែងដល់អ្នកដែលចាប់អារម្មណ៍ក្នុងការរៀបចំ និងចេញធ្វើសកម្មភាពវាយប្រហារភេរវកម្ម។
ណាសៀរ ត្រូវបានគេកាត់ទោសថ្ងៃទី២៧ ខែតុលា ឆ្នាំ២០២៣ បានសម្រេចចោទប្រកាន់ ៥បទល្មើល “ការបោះពុម្ពផ្សាយអត្ថបទភេរវកម្ម” ដែលផ្ទុយទៅនឹងផ្នែកទី២នៃច្បាប់ភេរវកម្ម (TACT) ឆ្នាំ២០០៦ ពាក់ព័ន្ធនឹងវីដេអូដែលគាត់បានចែករំលែក។ ណាសៀរ ក៏ត្រូវបានចោទប្រកាន់ចំនួន៥បទល្មើសផ្សេងទៀត “កាន់ឯកសារ ឬកំណត់ត្រាបម្រើឱ្យគោលបំណងភេរវកម្ម” ដែលផ្ទុយទៅនឹងមាត្រាទី៥៨នៃច្បាប់ភេរវកម្មឆ្នាំ២០០០ ពាក់ព័ន្ធទៅនឹងឯកសារ និងឯកសារឌីជីថលផ្សេងៗដែលរកឃើញមាននៅលើឧបករណ៍របស់គាត់។
ណាសៀរ បានសារភាពទទួលកំហុសចំពោះការចោទប្រកាន់ចំនួន៨បទល្មើស ក្នុងចំណោមបទល្មើសចំនួន១០ និងត្រូវបានកាត់ទោសឱ្យជាប់ពន្ធនាគារនៅថ្ងៃទី២៤ ខែកញ្ញា ឆ្នាំ២០២៤។ បទល្មើស២អំពីការបោះពុម្ពផ្សាយអត្ថបទភេរវកម្មនឹងបញ្ជូលទៅក្នុងពាក្យបណ្តឹង៕
ប្រភព [email protected] ចុះផ្សាយថ្ងៃទី២៥ ខែកញ្ញា ឆ្នាំ២០២៤
