ប្រទេសអ៊ីរ៉ាក់៖ មេដឹកនាំជាន់ខ្ពស់នៃក្រុមសកម្មប្រយុទ្ធជ្រុលនិយមរដ្ឋអ៊ីស្លាម (IS) ម្នាក់ត្រូវបានសម្លាប់កាលពីថ្ងៃអាទិត្យក្នុងប្រតិបត្តិការនៅខេត្តបាប៊ីល ភាគខាងត្បូងនៃទីក្រុងបាដាដ នេះបើតាមសេចក្តីថ្លែងការណ៍របស់កងទ័ពប៉ារ៉ាហាស់ស្ហាប៊ី។នៅក្នុងសេចក្តីថ្លែងការណ៍បន្ថែមថា យោងតាមរបាយការណ៍ចារកម្មបានឱ្យដឹងថា ទាហានប៉ារ៉ាដែលគេស្គាល់ថាជាកម្លាំងប្រមូលផ្តុំដ៏ល្បីល្បាញបានធ្វើប្រតិបត្តិកានៅក្នុងតំបន់ជឺហ្វអាលណឺសភាគខាងត្បូងក្រុងបាដាដ សម្លាប់ក្រុមសកម្មប្រយុទ្ធម្នាក់ដែលគេជឿថាជាមេដឹកនាំរបស់ក្រុមសកម្មប្រយុទ្ធនៅខេត្តភាគខាងត្បូងប្រទេសអ៊ីរ៉ាក់។
មន្ត្រីប៉ូលិសខេត្តប៉ាប៊ីលសុំមិនបញ្ចេញឈ្មោះប្រាប់ភ្នាក់ងារសារព័ត៌មានថា មេដឹកនាំជាន់ខ្ពស់ក្រុមសកម្មប្រយុទ្ធដែលជាអ្នកទទួលបន្ទុកក្នុងការវាយប្រហារជាច្រើនលើកប្រឆាំងនឹងកម្លាំងសន្តិសុខ និងជនស៊ីវិល។
គួររំលឹកផងដែរថា ស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរជាងមុន ចាប់តាំងពីកម្លាំងសន្តិសុខអ៊ីរ៉ាក់កម្ចាត់ក្រុមសកម្មប្រយុទ្ធរដ្ឋអ៊ីស្លាមក្នុងឆ្នាំ២០១៧។ ទោះបីជាយ៉ាងណាក៏ដោយក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់សំងំលាក់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀត និងបានវាយឆ្មក់ជាញឹកញាប់មកលើកម្លាំងសន្តិសុខ និងជនស៊ីវិល៕
ប្រភព Xinhua ចុះផ្សាយថ្ងៃទី៧ ខែតុលា ឆ្នាំ២០២៤
