ប្រទេសស៊ីរី៖ ទូរទស្សន៍រដ្ឋស៊ីរីបានរាយការណ៍ថា កម្លាំងការពារដែនអាកាសស៊ីរីឆ្លើយតបវិញទៅនឹងការវាយប្រហារតាមអាកាសរបស់អ៊ីស្រាអែលមកលើទីតាំងយោធាជាច្រើនកន្លែងនៅខេត្តហូម នៅពេលយប់ថ្ងៃអាទិត្យនេះ។
ទោះបីជាសេចក្តីរាយការណ៍នៅមិនទាន់ផ្តល់ព័ត៌មានលម្អិត ប៉ុន្តែសាក្សីឃើញផ្ទាល់ភ្នែកបានប្រាប់អ្នកយកព័ត៌មានថា ការវាយប្រហារទាំងនោះសំដៅលើតំបន់មួយចំនួននៅភាគខាងកើតទីក្រុងហូម និងភាគខាងត្បូងនៃប្រទេស។
មីស៊ីលមួយគ្រាប់ក្នុងចំណោមមីស៊ីលជាច្រើនគ្រាប់ធ្លាក់នៅក្បែរទីក្រុងហូមលើផ្លូវសាឡាមីយ៉េ បណ្តាលឱ្យផ្ទុះយ៉ាងខ្លាំង។
គួរបញ្ជាក់ផងដែរថា ការវាយប្រហារនេះកើតឡើងបន្ទាប់ពីការវាយប្រហារតាមអាកាសមួយផ្សេងទៀតរបស់អ៊ីស្រាអែលនៅពេលព្រឹកថ្ងៃដដែលទៅលើតំបន់ឧស្សាហកម្ម ហាស់យ៉ា ក្នុងទីក្រុងហូម៕
ប្រភព Xinhua ចុះផ្សាយថ្ងៃទី៧ ខែតុលា ឆ្នាំ២០២៤
