ប្រទេសអ៊ីរ៉ាក់៖ ក្រុមសកម្មប្រយុទ្ធរដ្ឋអ៊ីស្លាម (IS) ៤នាក់ ក្នុងនោះមានសមាជិកជាន់ខ្ពស់ម្នាក់ត្រូវបានសម្លាប់ក្នុងការវាយប្រហារតាមអាកាសលើទីតាំងលាក់ខ្លួនរបស់ពួកគេនៅក្នុងខេត្តសាឡាហ៊ូឌីន ភាគខាងជើងទីក្រុងបាដាដ នេះបើតាមយោធាអ៊ីរ៉ាក់រាយការណ៍នៅថ្ងៃអង្គារនេះ។
ការវាយប្រហារតាមអាកាស ដែលធ្វើឡើងដោយយន្តហោះចម្បាំង F-16 របស់អ៊ីរ៉ាក់ នៅថ្ងៃចន្ទនេះ បានកំណត់គោលដៅទៅលើទីតាំងលាក់ខ្លួនរបស់ក្រុមសកម្មប្រយុទ្ធរដ្ឋអ៊ីស្លាម (IS) ដោយផ្អែកលើរបាយការណ៍ចារកម្មនៅក្នុងតំបន់ខ្ពង់រាបក្បែរតំបន់ប្រជុំជន អាល់ អេត។ នេះបើយោងតាមសេចក្តីថ្លែងការណ៍ដែលចេញផ្សាយដោយ ក្រុមព័ត៌មានសន្តិសុខ ដែលមានទំនាក់ទំនងជាមួយបញ្ជាការប្រតិបត្តិការរួមរបស់អ៊ីរ៉ាក់។
កាលពីព្រឹកថ្ងៃអង្គារ កងទ័ព និងអង្គភាពស៊ើបការណ៍ ត្រូវបានបញ្ជូនទៅទីតាំងវាយប្រហារតាមអាកាសដែលជាកន្លែងពួកគេរកឃើញសាកសពចំនួន ៤ ដែលសាកសពមួយក្នុងចំណោមសាកសពទាំងអស់ត្រូវបានគេជឿថាគឺ លោក អាបូ អូមឺ អាល កាហ្ស៊ីម ដែលជាមេដឹកនាំក្រុមសកម្មប្រយុទ្ធរដ្ឋអ៊ីស្លាម IS នៅក្នុងខេត្តសាលាហ៊ូឌីន។
អង្គភាពនេះក៏បានរកឃើញខ្សែរក្រវ៉ាត់បំផ្ទុះ៣ខ្សែរ កាំភ្លើងជាច្រើនដើម គ្រាប់បែកដៃជាច្រើនគ្រាប់ វែនតាមើលពេលយប់ជាច្រើនគ្រឿង ទូរស័ព្ទដៃជាច្រើនគ្រឿងរបស់ក្រុមភេរវករ និងសម្ភារៈផ្សេងៗជាច្រើនទៀត។
គួររំលឹកផងដែរថា បើទោះបីជាស្ថានភាពសន្តិសុខនៅក្នុងប្រទេសអ៊ីរ៉ាក់មានភាពប្រសើរជាងមុនចាប់តាំងពីកម្លាំងសន្តិសុខអ៊ីរ៉ាក់កម្ចាត់ក្រុមសកម្មប្រយុទ្ធរដ្ឋអ៊ីស្លាមក្នុងឆ្នាំ ២០១៧ក៏ដោយ ប៉ុន្តែក្រុមសកម្មប្រយុទ្ធរដ្ឋអ៊ីស្លាមដែលនៅសេសសល់សំងំលាក់ខ្លួននៅតាមទីក្រុង តំបន់វាលខ្សាច់ និងតំបន់ខ្ពង់រាបផ្សេងទៀត និងបានវាយឆ្មក់ជាញឹកញាប់មកលើកងកម្លាំងសន្តិសុខ និងជនស៊ីវិល៕
ប្រភព Xinhua ចុះផ្សាយថ្ងៃទី៨ ខែតុលា ឆ្នាំ២០២៤
