ប្រទេសស៊ីរី៖ អ្នកសង្កេតការណ៍សិទ្ធិមនុស្សស៊ីរីបាននិយាយថា ការវាយប្រហារតាមអាកាសរបស់អាមេរិកបានសម្លាប់សមាជិក៥នាក់របស់ក្រុមសកម្មប្រយុទ្ធដែលគាំទ្រដោយអ៊ីរ៉ង់ និងសមាជិកជាច្រើននាក់ផ្សេងទៀតរងរបួសនៅភាគខាងកើតប្រទេសស៊ីរីនៅថ្ងៃអង្គារនេះ។
ក្រុមអ្នកសង្កេតការណ៍ដែលមានមូលដ្ឋាននៅប្រទេសអង់គ្លេសបានរាយការណ៍ថា យន្តហោះចម្បាំងអាមេរិកបានកំណត់គោលដៅវាយប្រហារលើចំនុចប្រមូលផ្តុំយោធានៅតំបន់វាលខ្សាច់ អាល ឃ្វួរ៉ីយ៉ាហ នៃខេត្ត ឌៀរ អេហ្ស័រ។ មានគេនិយាយថា ការវាយប្រហារតាមអាកាសកើតឡើងបន្ទាប់ពីគ្រាប់រ៉ូកែតដែលគេជឿថាត្រូវបានបាញ់ដោយក្រុមសកម្មប្រយុទ្ធដែលគាំទ្រប្រទេសអ៊ីរ៉ង់បានធ្លាក់នៅក្បែរមូលដ្ឋានអាមេរិកក្នុងតំបន់ជនបទ អាល ហាសាកាស ភាគឦសានប្រទេសស៊ីរី។
ស្របពេលនោះផងដែរ ការផ្ទុះជាប់ៗគ្នាដែលប្រភពបាញ់មិនដឹងចេញពីណាបានបន្លឺសំឡេងឡើងនៅមូលដ្ឋានយោធាអាមេរិកនៅខាងក្នុងតំបន់មូលដ្ឋានប្រេង អាល អូមារ ក្នុងខេត្ត ឌៀរ អេហ្ស័រ នេះបើតាមសម្តីរបស់អ្នកសង្កេតការណ៍។
អ្នកសង្កេតការណ៍បានបន្ថែមថា គេបានប្រទះឃើញយន្តហោះចម្បាំងអាមេរិកហោះលើភូមិមួយចំនួនដែលបានហោះទៅដល់ទីប្រជុំជនមេយ៉ាឌីន ក្នុងខេត្ត ឌៀរ អេហ្ស័រ ក្បែរព្រំដែនប្រទេសអ៊ីរ៉ាក់។
ពុំទាន់មានរបាយការណ៍អំពីចំនួនអ្នកស្លាប់និងរបួសបន្ថែមទៀតទេ។
គេសង្កេតឃើញថា តំបន់នោះមានការកើនឡើងនៃភាពតានតឹងរវាងកងកម្លាំងអាមេរិក និងក្រុមដែលគាំទ្រដោយអ៊ីរ៉ង់ដែលកើតឡើងគួរឲ្យកត់សម្គាល់នៅភាគឦសានប្រទេសស៊ីរី៕
ប្រភព Xinhua ចុះផ្សាយថ្ងៃទី២០ ខែវិច្ឆិកា ឆ្នាំ២០២៤
